頭一擺去舊厝，看到滿桌ê菜，有魚、有肉、擱有二款湯，以為是要請人客，後來每擺去，嘛是看到規桌上不同款ê菜色，未輸佇辦桌，原來攏是阿姑ê傑作，彼時不了解，慢慢才知，規厝間ê人攏會來吃飯，我若去，嘛是一直招呼我。

    遮多年來，無論是主日禮拜、家庭禮拜、祈禱會、探訪、婚、喪事，婦女團契及婦女詩班，阿姑一定會出席。全心服事教會事工，伊藉上帝榮光，照亮身邊有需要ê人，無私的對待熟識及無熟識ê，這是阿姑仁慈、博愛ê表現。

    阿姑照顧阿嬤及陪伴智玉阿姑ê情景，對長輩及親人、會友ê態度，逐人攏有看到；對序細的教育及親切ê面容；對晚輩ê照顧及幫助，連我也感念在心。

    如今，阿姑有真優秀ê子孫，嘛有在教會服事，「聖神結的果子，是仁愛歡喜和平吞忍慈悲擱善良，是信實溫柔撙節。真有福氣，順從聖神的人伊就結好的果子，伊就會得永遠活命」，阿姑一世人ê德性，堪得眾人感懷、讚美。