湾生，一阵共台湾当做in的故乡的日本人。

　　我上佮意的阿公阿妈是富永胜阿公佮多恵子阿妈，in予我感觉有满满的热情佮对台湾的热爱，毋是讲别人无，毋过我感觉in是真可爱的两个阿公阿妈，可能是本身就是真有活力的人，毋过我更加相信是因为in对台湾的爱，予in伫这片土地的时阵予in有美好的感觉。

　　伫富永胜阿公来到伊的一个朋友in兜，煞发现伫伊ê卡片寄著进前，伊的朋友煞已经过身矣，伊的真济朋友嘛真济拢无伫咧矣，这予我感觉真毋甘，我无法度想像伫满心欢喜来到台湾（伊的故乡）的时阵，煞人事已非的感觉，彼有偌艰苦？毋过伊对台湾犹是充满热情，听伊讲起伊的回忆，我感觉嘛会当感受著遐ê美好的少年时光。

　　另外一个多恵子阿妈我更加佮意，可能伊的个性本底就是我较会佮意的老人，伊予我感觉真坚强，嘛有对台湾不变的热情佮坚持，已经毋但是对台湾的回忆尔尔，彼是对台湾真正的爱，所以伊伫揣著伊的户口的时阵、提著遐ê资料的时，忍袂牢伊的目屎，彼是对伊的故乡的渴慕。伫伊转去台北女中的时，我看著以早的相片佮这马强欲拢无啥变，我就想，若是我，一定真感慨、真感动，若是我伫彼个岁数，转去到以早的学校，拢敢若犹会当看著家己以前伫内底的生活佮模样，我应该会挡袂牢我的目屎。

　　我咧想，遮ê阿公阿妈，in对台湾的爱，阮敢比ê著？台湾是咱的国家，毋过伫真济人心底，台湾敢是in的故乡？可能湾生是因为in一生当中上美好的时间、上单纯的时间、上敢去爱的时间，拢是伫台湾度过ê，所以in留咧遐ê美好印象，对台湾有无法度取代的归属感；毋过伫台湾出生大汉的阮，敢有按呢去珍惜过一片土地？我定定咧想，siáng是台湾人？这是伫这马的台湾社会当中，定定会讨论著的问题。确实，我认为，真正爱台湾ê，就是台湾人矣，无啥物伫佗位出生、祖先是佗位的人的问题，真正的问题是，你爱台湾无？