「反抗的精神佮對社會的著急造成好的文學」，我感覺這句話會當真好的回應這篇論文對施明正佮七等生的評論。

　　佇這篇論文內底，宋澤萊直直強調的是一個「反抗」的精神，佮存在主義有真大的相關，「但存在主義哲學根本上是一種『反抗的哲學』」（勞思光，《存在主義哲學新編》），存在主義其實就是一種誕生佇時代下的產物，人佇一種極權的環境下，想欲追求一種「自我」，「凡是活在極權政治下的人們……就得接觸存在主義」（勞思光，《存在主義哲學新編》），所以講，「反抗」是為著欲佇按呢的環境內底維持一個「個體」，彼就是一款存在主義。

　　〈白線〉這篇小說，我感覺白線代表一種「規矩」，一個「軌道」的概念，因為男主角就是佇路上的白線頂出車禍--ê，敢若咧講，伊因為家己無法度控制的原因（路面傷滑）才會偏離原來駛車的路壓到中間的白線，若像伊的人生。

　　七等生的〈我愛黑眼珠〉嘛實在是真經典的作品，阮進前有讀過、嘛有做過分析，毋過我感覺這擺的論文予我另外一種角度，雖然當時我是用「存在主義」來看這篇小說無毋著，毋過彼當陣我只是用真簡單的面向咧看，煞毋知「存在主義」的實際內涵閣有真濟通看；宋澤萊用伊會當暗喻戰後臺灣真生狂的角度來看，有影予我一個新的看見，這是較「大」的視野，我進前攏無想著，這篇小說的劇情雖然有夠譀古，譀古到我當時毋知影欲按怎來寫伊的賞析，毋過若是佇彼當中來看臺灣人的心情，煞袂真歹理解，若是欲講伊是《異鄉人》的翻版，彼應該是共晴子叫做故鄉、妓女叫做異鄉矣！

宋澤萊用存在主義的「抵抗」精神咧講這幾篇小說，其實我原底無瞭解咧寫「誤會」佮「譀古」的小說佮「抵抗」的精神有啥物關係，毋過我想想咧，伊應該是咧講，透過「抵抗」的小說會當看出--來，人愛追求家己所是，揣--著家己，抑無就會變做「譀古」佮「誤會」的小說內底彼款的人生，毋過其實作者寫出遐ê小說，本身嘛是一種「抵抗」，因為in用按呢的方式來諷刺、來反應社會的現實，這嘛是一款「存在」。

Q：你感覺施明正佮七等生的「反抗」精神，存在佇in描寫譀古誤會小說的佗位？