好癡線咁ｃｈｕｒ完功課又ｃｈｕｒ文～
同大家道一個歉，呢度已經變成我既牢騷場咁滯。。。
想睇好文請多多支持輔仁、立場，真係好感激佢地，冇佢地冇今日。
寫文令我認識左好多同好，亦都令我重新認識自己既內在價值。

我從來都明白自己並唔係一個有外在美，或者性格非常吸引人既人。
所以，透過我既文章同思想認識我既人，比較唔會討厭我～

咁講係因為最近有兩件令我非常不快既事發生了。
我在努力調整自己既身心。

原來我以為只要自己靜靜一個，唔同任何人有非必要交流就唔會得罪人／做錯事，點知。。。
唉。。。又惹埋Ｄ唔知咩人。。。
我記得自己第二次實習俾人針對，一個人匿係實習室後面個藥櫃啜泣，諗住唔會打擾到人／俾人發現，點知ＭＩＳＳ張竟然行過黎執個藥櫃。。。
果刻尷尬到不停講對唔住、唔好意思，因為我知ＭＩＳＳ張係課程顧問又要教書，我唔係想要佢關心或者聽我講發生咩事。
我只係想喊完再去寫返自己個實習日記（我一開始就自己整既日記，用黎檢視自己每日實習學到咩、有咩做得好／做得唔好、遇到特別既事。我真係鍾意呢行架，所以我唔想再解釋喇。你到而家死都要否定我既熱誠就請移玉步啦。），因為其實喊下、情緒有宣洩既位，我就會慢慢自己變得ＯＫ了。

所以，我同Ｄ會否定人情緒既人真係相處唔到。
其實，我做錯Ｄ咩先要同呢Ｄ人相處？
就算係一陣，都痛苦到令人想死。

哈，又一堆解釋。
不過，有Ｄ人就算你解釋完都係會繼續去「認為」佢既認知。
有時，我都唔明呢Ｄ人點解會需要同人相處，咁唔想顧人感受，不如你自己搬去孤島住啦～

講返正題，ＭＩＳＳ張見我咁慌張，佢好冷靜咁扶起我，帶我坐埋一邊，問我可唔可以講下發生咩事。
我深呼吸、嘗試中性Ｄ咁去講。
佢聽完，冇任何責備或否定，只係同我講「一個人唔鍾意你，你連企係佢附近呼吸都係錯架啦。」

之後，佢問我去邊，聽完就叫我唔好放棄，然後我就走喇。

加油、努力既說話其實果一刻真係唔需要，因為我日日都係咁。

而家諗返，果時既我初出茅廬都令人幾激心。
亦令我知道：「曹操都有知心友，關公亦有對頭人」。
你唔可能令全世界既人都鍾意你，就算係神，都有唔信佢既人。

最怕就係Ｄ你明明乜到冇做，佢自己癡埋黎、要乜要物，你俾完佢仲要嫌三嫌四咁。
就好似呢度咁，一向都係我自己自說自話、下放情緒既地方，從來唔打算對任何人公開。
你搵到係你好野：Ｏ｝

理所當然，文章比較自我中心，因為全部係我以第一生去講返自己發生咩事嘛～
全部都係我所思所感。
因為，以往係我冇可以傾計既朋友；而家係唔想令身邊既朋友有情緒負擔。
我唔開心，你地同我去食好野、俾我抱抱就ＯＫ啦～

認為我響度講Ｄ野太自我中心既人，咁你同投訴成人展太色情果Ｄ怪獸家長有咩分別？

唔鍾意就唔好睇，就係咁多。
我冇收你錢架、亦都冇欠你架。

想知發生咩事既讀者，自己私訊問我啦～