好熱鬧。

今年10月踏入4字頭的熊黛林（Lynn），自從為百億富二代老公郭可頌誕下一對孖女後，便減少幕前工作做幸福人母，有傳一直想為郭家添丁的她，去年更由北角半山進駐東半山過億豪宅作準備，Lynn媽亦搬埋入去一齊住，幫手照顧孫女，好讓兩夫婦多點時間過二人世界！新冠肺炎肆虐，郭氏伉儷都不敢周圍去，早前他們終於「出關」，同行不但有工人姐姐，還搵埋Lynn媽和郭可頌媽媽出馬，嫲婆合體一齊湊住1歲多的孖女去數碼港公園散步，認真大陣仗！

熊黛林早前一家六口去散步，更嫲婆合體湊孖女，認真大陣仗！

2016年，熊黛林下嫁郭可盈胞弟郭可頌，並於前年4月誕下一對孖女Kaylor和Lyvia。升為人母後，Lynn刻意減產專心相夫教女，閒時又於社交網大曬囡囡萌照，幸福滿瀉。早前，Lynn就全家總動員湊孖女去公園玩，見公園都好人頭湧湧其實都幾高危！

早前，熊黛林一家六口加工人齊到數碼港公園「放電」。

當日下午3時許，Lynn與老公、孖女、媽咪、奶奶，一家六口加工人姐姐戴上口罩現身數碼港公園，一對乖孫就好梳乎地坐住BB三輪車，由婆婆和嫲嫲全程推住「遊車河」，由於公園內有不少小朋友喺度玩，兩隻妹豬都不時眼仔碌碌四圍望，八卦得嚟又可愛！沿途一路行，郭可頌也很忙碌不停講電話，去到中央位置，Lynn就幫手抱起大女Kaylor，之後同媽咪一齊拖住囡囡散步，不過見Lynn側曬膊咁，相信身高約1.78米的她湊住細細粒的孖女都幾辛苦！

熊黛林同媽咪乘機教囡囡生字，寓學習於娛樂。

難得親親大自然，Lynn與婆婆亦趁機來個「課外學習」，指住啲花花草草、雀仔教嚇囡囡生字，其間見到有人吹泡泡，畀人影慣的名模Lynn即化身攝影師，追住愛女影寫真，見老公終於放低手機，她就替兩父女拍下溫馨郊遊照，雖然隨後都有幫細女Lyvia影相，但兩公婆似乎較偏心錫大女，郭可頌不單止全程抱住Kaylor，還舉起她大玩「空中飛人」，氹得囡囡好開心。逗留半小時後，兩位老人家便一人抱住一個孫登上座駕，Lynn夫婦就捽完搓手液先上車，她亦都不忘幫兩老和孖女消毒，臨離開前，Lynn又禮貌地向記者揮手道別。

身高約1.78米的熊黛林側曬膊拖住大女Kaylor！

見到有人吹泡泡，熊黛林即刻幫Kaylor和爸爸影相。

郭可頌似乎較偏心大女Kaylor，他同囡囡玩「空中飛人」又抱實她。

細女Lyvia全程坐在BB三輪車上，熊黛林都不忘為她影嚇靚相。

上車前，郭氏伉儷都有捽嚇消毒搓手液，防疫意識甚高！

離開時見有記者在場，熊黛林都好Nice地揮手拜拜。

熊黛林跟奶奶、二姑奶郭可盈一家關係都不錯。

有指熊黛林希望於40歲前為郭家追多個仔，多得兩老幫手湊女，兩公婆多了時間相處。

熊黛林亦得閒做嚇運動，調理身子。