十大台湾必去私房秘景，你又识得几多个？

其实台湾仲有好多地方你未去过！

香港人成日都当正台湾系长洲咁去，已经去到可以话喺台湾偏地开花，但你依然仲系一如既往嘅行程：放天灯、行老街？但其实仲有好多打卡靓景嘅地方，适合同你最好嘅旅伴或者屋企人一齐去。今日就等DailyView以《KEYPO大数据关键引擎》分析台湾网民嘅网路大数据，统计2019年07月29日至2019年10月26日共三个月区间嘅《网路口碑－私房秘境》，话你知台湾人都系点捐窿捐罅玩啦！

10 台南市美术馆二馆

台南市美术馆二馆系俾台南人称为台南市内最好行嘅建筑物！佢都算系一个新景点嚟㗎，仲要喺台南著名景点林百货同孔庙隔离，真系方便游客一炮过去咁多个景点～不过根据台湾网民嘅温馨提示，大家记得要预多啲时间去行，因为台南市美术馆二馆入面有成17间展馆，行完仲可以行埋去美术馆一馆打卡影相，真系分分钟行成日都行唔晒！

地址：台南市中西区忠义路二段1号

image source:

9 台东比西里岸

连接住台东三仙台嘅北部海岸就系台东比西里岸啦！其实呢个名系由阿美族语”pisilian”诞生，指嘅就系放羊的地方（pi=放羊嘅「放」；sili=羊；an=地方），呢个地方特别在佢系由台湾著名画家几米出手制作咗好多艺术品，例如系羊仔同白兔公仔，好多人都同佢地影相打卡。除咗大型公仔，比西里岸嘅村入面都有十几幅几米嘅画作喺度，好多几米fans都会慕名而来，游客望完海又可以入村落玩，正！

地址：台东县成功镇白莲路

image source:

8 基隆阿根纳造船厂

由1919年就喺度嘅基隆阿根纳造船厂，前身系用嚟存放煤矿。不过最后因为公司经营不善就荒废咗啦，不过荒废都有佢荒废嘅美！正正系因为呢个卖点，吸引咗好多台湾人都影文青照，佢地仲觉得有种颓废嘅浪漫𠻹！除此之外，呢度仲有好多人过嚟影广告相同婚纱相，可想而知呢个荒废景点系有几热门！但由于系荒废嘅建筑物，都算叫历久失修，大家去嘅时候记得要注意安全！

地址：基隆市中正区正滨路116巷75号

image source:

7 花莲石梯坪

石梯坪系位于在花莲县丰滨乡石梯湾嘅南侧尾，系一个有好多嘢玩嘅地方！除咗可以潜水同矶钓，仲可以喺度露营𠻹！呢度嘅生态环境连台湾人都赞好～除咗海水清澈之外，仲有好多寄居蟹、海星等等可以睇！如果钟意睇海豚嘅，嚟呢度就啱晒！因为呢度仲有得畀你坐船出海赏鲸，系台湾赏鲸嘅发源地嚟㗎！睇住啲珊瑚礁群同热带鱼群，个人心情都开心啲呀！

地址：花莲县丰滨乡石梯坪52号

image source:

6 新竹新丰红树林生态保护区

新丰红树林生态保护区系好多台湾人都会带小朋友一齐玩嘅地方，因为大家都可以藉住呢度去教导小朋友认识生态环境同唔同动物！呢一大片红树林占咗成宽8.5公顷㗎！而且呢度仲系台湾唯一建有观赏步道嘅生态保护区～呢度都有一个大家热门打卡影相嘅地方，就系入绿色丛林之前嘅位置啦～网民话呢度好有龙猫电影场景㖞，唔知去过嘅你又觉唔觉呢？

地址：新竹县新丰乡池府路156号

image source:

5 阳明山黑森林

大家上阳明山睇夜景就睇得多，但系又知唔知阳明山有个黑森林呢？唔系黑森林蛋糕呀！呢度有个好出名好多人打卡嘅景点，就系叫双心石地啦，除咗影婚纱相，无论系本地人定外国游客嚟到都一定会影返张相先走！呢个双心石地系由石头堆砌而成，红色心形放喺树林入面非常耀目！其实黑森林占地不大，行一个钟大概就行完㗎啦，所以好适合啲短程游客嚟行下！

地址：台北市北投区竹子湖路

image source:

4 新北老梅石槽

位于台湾新北嘅老梅石槽又叫做绿石槽海岸，系因为啲海藻附著咗喺啲石槽上面，远望过去成遍线色，呢个view仲被称为系全台少见嘅特殊景观，台湾网民就推荐最好就3月中到5月头过嚟观赏，特别系喺4月嘅时候系最靓，到时成个海岸沟槽上面都会黐满海藻，非常特别㗎！甚至有网民话呢度好似一旧「美丽可口嘅海苔寿司卷」，想像力真系超丰富呀～

地址：新北市石门区下员坑

image source:

3 桃园石门山

桃园嘅石门山又叫做小竹坑山，海拔有551公尺，从山顶望落去可以俯瞰到龙潭地区。其实桃园嘅石门山系一个步道嚟，听落去好似好辛苦，但其实好多人都去行架！因为步道坡度并唔大，大家都行得好轻松，而且假日仲有好多摊贩，行完步道仲可以抖下食下嘢，简直系适合一家大细都参与得嘅健康亲子乐活动呀！不过就算几易行都好，大家都记得要注意安全，量力而为呀！

地址：桃园市龙潭区石门登山口

image source:

2 花莲赤柯山/赤科山

呢个位于花莲嘅赤科山，好多网民都推荐大家七月到十月嚟，因为呢个时候系金针花季，成遍山丘都系黄色嘅金针花海，超级靓呀！大家嚟到呢个赤科山，都会去睇埋赤柯三景，包括系金针花海入面三个黑色火成岩，千吨石龟同埋几十年历史嘅汪家古厝。如果冇车牌嘅游客嚟到呢度都可以join当地嘅一日赏花专车游，仲可以同司机倾好自己想去嘅赏花路线，非常弹性！

地址：花莲县玉里镇赤科山

image source:

1 基隆和平岛公园

呢个公园基本上基隆人都一定去过，佢位于基隆港港口东侧，有好多海蚀地形奇观可以睇，例如系豆腐岩、万人堆、狮头岩、熊头岩等，系咪听落去个名都好奇怪呢XD，另外呢度一年四季都会有人嚟垂钓，因为呢度随季节会有好多唔同嘅生物，例如青鱼龙虾等等。好多家长都会带小朋友过嚟广阔佢哋嘅眼界㗎～不过大家要注意，和平岛公园系收入场费㗎，不过唔贵，值得一去！