條魚未買時就生生猛猛係水遊，點解劏咗之後凍冰冰？大家沒有望錯，真係有人發出此疑問！

一名應該係來自屯門良景邨的女網友，認為自己遭到魚檔老闆欺騙，疑似用冰鮮魚充當新鮮活魚，投訴無門之下將遭遇在Facebook羣組分享「討回公道」，結果遭到一面倒恥笑。

據女事主的帖文所講，她在良景街市購買活魚，發現即場劏好的活魚魚身「凍冰冰」，向魚檔老闆投訴後，對方解釋「水凍魚點會唔凍」。女事主唔服氣，於是向街市管理處投訴，但同樣獲答覆魚身冰凍屬正常現象。今次女事主雖然話就話「無話可說」，但就指「有人說大陸人騙人，我覺得香港人有啲都一樣」，更指責街市職員態度越來越差，還被兩個檔主圍攻話佢傻，認為係欺人太甚！最終她決定在網上公開事件，希望獲網民認同。

帖文一出即引起熱議，一眾網民都表示對女事主理解不能：「你幾時買過魚係有體溫？」、「畀條暖嘅你，你仲驚！」

有記者就事件向香港海鮮聯合總會主席李彩華瞭解情況，李彩華表示魚屬涼血動物，體溫隨環保轉變，水凍魚身自然凍，又謂劏魚過程會或經由凍水「洗水」魚身，會令活魚魚身顯得比平時更加凍。