第四天，譚詠麟mode，我卻覺冷又寒，縮起雙肩苦笑著，北風彷彿身邊四吹……

是日行程只有一個景點🗿Ales Stenar，複雜程度卻超乎我哋想像🙄；早完餐搵酒店幫我哋卜巴士，點知佢駁上駁上駁上駁😴…咗20分鐘才幫我哋卜得到，真係辛苦曬🙇！嘭嘭聲買完車飛趕上🚊火車去Ystad，旅客中心個阿姐💁話回程要喺荒野行5⃣Km纔有巴士站（明明谷歌話可以巴土轉巴士…🤔），最慘就係連預卜咗嘅小型巴士🚐到夠鐘都冇出現，正想打消行程😭之際，有個只講瑞典文嘅司機👮停車講咗堆嘢，終於上到車😑！落車行20分鐘🕝就到景點，食咗個🐡漁村風味午餐就上山食咗一個鐘🌪風回程，結果真係有巴士…谷歌大神真偉大！成功回歸諗住食返🍖餐好嘅獎勵自己，點知又貴，服務又差，幾好食都冇用啦😠！

雖然今日景點只有一個：Ales Stenar，但係探險味道勁濃，因為Ales Stenar喺一個好荒蕪嘅地方，我哋又唔自駕，只可以搭火車同巴士前往，搭火車唔係問題，反而搭巴士先係問題。

由於當中有d變數係我哋控制唔到嘅，所以，我哋都唔食咁耐早餐，早少少去處理，先講講今次嘅交通安排，等大家都知道個麻煩位喺邊度。

去程交通安排：

1⃣ 由Malmo坐火車去Ystad

2⃣ 由Ystad搭架392號巴士前往Ales Stenar，到達後，行20分鐘上個小山丘就到

回程交通安排：

3⃣ 由Ales Stenar行番出巴士站，先坐392去到荒山野巔（總站）

4⃣ 落車後向前行7分鐘，再轉570號巴士返Ystad

5⃣ 由Ystad坐火車返Malmo

整件事情最困難嘅地方係2⃣。2⃣嘅困難係在於要卜車，因為我哋要坐嗰班車唔係正常班次，要打電話去卜先會有車嚟，但係我哋唔識瑞典文，所以最好嘅方法，就係搵酒店嘅reception幫手打電話。

當我哋講比個reception姐姐知道，我哋想卜車時，佢都覺得好奇怪，點解要卜，我哋解釋完後，佢都唔係好明，不過佢照幫我哋打電話去卜，但係呢個電話一打就打咗20分鐘，當中係有人同佢傾過嘢，但係傾嚇又等嚇，駁上駁上駁咁，我哋預留嘅時間就越嚟越少，好彩，到最後終於卜到車，我哋跟住就急急腳咁走去火車站。

（早上，天陰…）

搞掂咗個巴士booking，跟住就要爭取時間去買24小時Skane Transport Pass，好彩尋晚已經知道點樣買飛，所以都唔洗搞太耐就買到，再睇睇個時間，仲有時間剩，終於可以鬆一口氣…

（流流地嘅Travel Pass）

可能我哋到訪嘅時間唔係旺季，所以無咩人搭火車……

（Selfie @ 火車）

（好快趣就去到Ystad）

由於時間尚早，可以喺Ystad行個圈，哈哈，竟然比我哋見到個遊客中心，我哋當然要入去參觀一下啦，睇嚇有無手信或者postcard賣都好嘛。

（Ystad遊客中心）

呢個遊客中心有手信賣，仲有職員可以介紹附近嘅景點，點樣去都會教埋，真係好。既然仲有時間，再加上已經卜好車，不如扮下唔識，問嚇個職員點去Ales Stenar都好。

（先取票 後問人）

等咗幾分鐘就輪到我哋，我哋就照問點去Ales Stenar啦，個職員話無我哋卜嗰班車，要等到兩三點先有，唔係呀fa，而家11點幾咋！我哋再問回程嘅車呢，佢話無回頭車由Ales Stenar番Ystad，要我哋由Ales Stenar步行5km嘅路，喺個中途站上車，咁就可以番到嚟Ysatd。

世事就真係咁奇怪，我哋喺Google Map同網上搵到嘅答案，同當地人所比出嘅答案真係有好大出入，去到呢一刻，我哋都懷疑緊：

係咪真係卜到車？

架車真係會嚟？

架車會車到我哋去Ales Stenar？

真係有回程車番到嚟？

呢一刻真係有種前路茫茫嘅感覺，既然已經卜咗車，咁就去巴士站等架車出現啦，如果佢出現，我相信係可以車到我哋去目的地；至於回程，有固定班次，只要唔好miss班車，我相信都唔會有太大問題。

（去巴士站等車）

到咗約定嘅時間，我哋都仲未見有巴士到，過咗10分鐘左右都未見架車，老婆就上番巴士公司嘅網頁同人live chat，問嚇架車係咪嚟緊，點知對方話check唔到！咁即係點呀？

等？要等到幾時？

唔等？今日去邊好？

正當猶疑之際，架「巴士」終於嚟到，個司機落車嘰哩咕嚕咁講咗一堆嘢，相信係瑞典文吧，我哋聽唔明，用英文話佢知我哋要去Ales Stenar，佢就開車門示意我哋上車，跟住就正式踏上我哋冒險之旅。

為免被賣豬仔，我上車無耐已經開著Google Map，set咗目的地係Ales Stenar，一路都睇住個司機有無去錯地方，又或者車我哋去第二度，結果個司機係跟住條路線車我哋去目的地。

（司機的背影）

呢架就係我哋卜嘅巴士，成功帶我哋去Ales Stenar，唔係，應該咁講，係我哋成功地被帶到去Ales Stenar！

（帶我哋到Ales Stenar嘅「巴士」）

（我哋落車嘅巴士站）

落車後，行咗10分鐘就去到海邊，海邊有個小鎮仔，但係就無乜舖頭開門，可能係淡季，加上又凍又大風，所以無乜人嚟，亦都唔會有舖頭開門。好幸運地比我哋發現到有一間舖開門，點解會發現到呢？就係門口嘅postcard囉，哈哈～

見佢有開門，咁就入去睇嚇有咩賣啦，點知見到嘅都係雪糕雪條同小食，想搵d熱嘢食都無。後來個老細走出嚟問我哋想要乜，我咪問佢有無熱嘢食，佢話有漢堡包同炸魚薯條，我哋見方圓十里都無嘢食，而且都有d凍凍地同肚餓，所以就幫襯佢食嘢！

（飲杯咖啡暖嚇先～）

（老婆食炸魚薯條，我食炸魚漢堡）

其實喺等緊嘢食嘅時候，我哋仲幫襯咗佢買postcard啊～

食飽之後，就係時候去Ales Stenar喇～～出咗門口之後，對面有一間手信店，不過唔行住，一陣番嚟先行，我哋跟指示牌，沿樓梯行上去我哋嘅目的地。

（前進！）

行完樓梯之後，就係行斜路，當我哋回頭一睇，咦，呢度風景都好靚啊，不過係大風咗d啫～

（山坡美景）

行到上斜路頂之後，就會見到另一個指示牌，所以一定唔會行錯路。

（跟指示牌行啦！）

行咗一陣就見到幾塊板，板上高有好詳盡嘅介紹，講解Ales Stenar係乜，大概係同天文曆法有d關係，但係我都無乜點理佢，影咗張相就繼續向前行。

（Ales Stenar 說明板）

經過咗呢個說明板之後，大家就開始要小心嘞，因為大家已經步入「地雷陣」！！如果大家乖乖地行中間條路的話，就會好容易發現「地雷」處處，但係當你選擇行草地的話，你就好容易誤踏隱藏咗嘅「地雷」，所以想全身而進/退的話，行呢段路真係要小心啊！你睇嚇下面張相，喺沙地已經見到零星嘅「地雷」啊！

（穿越「地雷」陣之後，到達Ales Stenar！）

其實Ales Stenar對於一般人嚟講真係唔吸引，喺網上資料顯示，大部份人喺度逗留嘅時間只係15分鐘，而我哋呢？我哋食住風咁逗留咗一個鐘！點解？

第一，既然咁艱難先嚟到，無理由就咁睇兩嘢就走。

第二，係向呢個設計者致敬！

雖然我並唔明白呢幾十舊石頭有咩用，只知道係係同天文曆法有關，可能就係貪呢度夠偏僻，遠離人煙嘅地方，少d人為嘅污染，咁先可以準確地記錄到一d天文嘢。就係因為咁，我哋願意喺度食一個鐘頭嘅風。

（Ales Stenar，真係好大風！）

（喺另一邊影相，見到有其他遊客）

呢度嘅大風程度真係唔係講笑，想企定定影相都唔容易，搵舊石「埃」住影會好好多，再加上今日陰天，快門比較慢，唔搵舊石幫幫手，張相就會鬆鬱朦。

（「埃」住舊石影相）

其實呢一個鐘頭好快就過，因為我哋乜都影一餐，剛剛我哋發現到石圈中間有舊小石，係比其他石頭細塊好多，相信放得喺呢度，應該係有佢嘅用意，點都好啦，同佢影番幾張特寫先～

同佢影特寫都有少少難度，除咗要低炒之外，仲要留意附近有無「地雷」！喺呢舊小石旁已經見到一粒「地雷」。

（小石一舊）

（無聊起嚟，真係乜都影得一餐～）

（睇見佢d頭髮就知道有幾大風）

（一場嚟到，小羊羊都要打嚇咭先～）

我對呢度嘅形容係「大風到無朋友」，大家可能未必感受到，所以我哋行咗去近海嘅地方，一個更食風嘅位置，再拍埋個Video比大家睇，等大家都感受到有幾大風。

（你聽唔聽到我哋講嘢？🤣🤣）

拍呢段片嘅時候，我要先紥好馬步，企定咗之後先開始拍，拍嘅時候又大風又凍，完全講唔到一d要合埋口講嘅字，因為呢度真係好凍，凍到塊面都疆埋，其實咁辛苦為咩呢？哈哈～～雖然係自己攞嚟賤，但係呢一份經歷真係好特別，可以同老婆一齊探險，一齊去「極地」，一齊去瘋狂，我相信絕對值得！

食完一個鐘嘅風之後，都係時候要走嚕。行回程嘅路所需嘅時間相對短d，因為d風喺背後推住你，想行慢d都唔得，當我哋行到去個說明板時，風勢已經明顯減弱，終於感覺到自己未被凍疆，塊面都有番些少感覺，哈哈～～

途中見到有一個野餐嘅地方，再望望個牌，可以想像得到夏天嘅時候，海邊嘅餐廳開曬，四周都係遊客，有人企埋一邊吹水飲食，有人坐喺度野餐兼欣賞風景，嘩～～好熱鬧呀！可惜而家係冬天，鬼影都無隻啊……

（海邊餐廳及野餐區）

番到落嚟之後，見到有間手信店有開門，入去行咗個圈之後，買咗少少嘢，而當中就一定要買postcard啦，即買即寫即寄！

（喺Ales Stenar寄postcard）

睇睇時間，都差不多係時候番出巴士站，繼續我哋探險之旅嘅下半場…回程時見到個告示牌，雖然唔知佢講乜，但係睇圖都應該估到係講個海灘嘅水流，不過而家咁凍，邊會有人落水吖，應該係比夏天嘅泳客睇吧。

（「水流」告示牌）

當我行過咗個告示牌後，再望一望個海，真係有人落水啊！！😲😲原來個牌唔係講水流，而係話比d衝浪人士知道，出海嘅人就喺中間游出去，要乘浪埋岸嘅就向左右兩邊滑浪，我又真係無諗過原來衝浪都有規矩要守喎……

（咁凍都有人衝浪，勁！不過唔知你見唔見到呢？）

一路行番出去巴士站嘅時候，留意到呢一帶嘅環境都好寧靜，其實到咗夏天，呢一帶會有幾熱鬧呢？我估由巴士站到剛才滑浪嘅呢一段路，應該唔會太熱鬧，因為會搭巴士嚟嘅人應該唔多，試問有邊個會好似我哋咁樣去探險吖？

（Ales Stenar 附近嘅環境）

好快趣我哋就行番嚟巴士站，圖中紅色木屋仔就係巴士站，睇睇錶，架巴士仲有20分鐘先嚟到，咁就喺附近一邊影相一邊等啦。

（巴士站）

（等392號巴士去荒山野嶺）

一邊影相一邊等車嘅時間過得好快，終於見到架392埋站，亦即係話我哋嘅探險之旅已經接近完成！

（392埋站）

上咗車之後，我哋開住Google Map，睇住架車點樣行，無幾耐之後，終於嚟到呢個荒山野嶺巴士總站。到站時，司機都有提一提所有乘客，呢個就係「總站」，大家要落車嚕～

好彩，去到總站時仲有其他乘客，如果唔係，我哋都會懷疑自己有無落錯車，Google Map有無出錯，同埋會唔會比司機老坤🤣🤣

（荒山野嶺巴士總站）

落車後，根據Google Map所拍示嘅方向行，雖然我哋只係行7分鐘，而距離下一班車到站嘅時間就有20分鐘，但係心裏面都覺得要快d去到巴士站先得，如果架巴士行快咗，我哋就要等多一個鐘頭先等到下一班車，所以都係行快d好。

同我哋一齊落車嗰班小妹妹，可能佢哋唔係要轉車，所以佢哋係邊行邊玩邊吹水，阻住咗我哋趕車，唔理咁多，一個箭步就放甩咗佢哋。

（快放中@荒山野嶺）

行咗唔知幾多分鐘，終於去到巴士站，為免搭錯車，我哋睇多次呢個站有無570，再望一望個方向啱唔啱，一齊正確之後，終於可以鬆一口氣，因為整個探險旅程中，最困難嘅部分已經成功渡過，唔洗擔心會滯留荒野，只要安心等候架570，咁就可以番到Ystad火車站。

（Yeah~~搵到個570巴士站）

能夠去到呢個巴士站，我哋當然開心啦，但係同我哋一齊等巴士嘅人就有d奇怪，先此聲明，我哋絕對無歧視任何人，喺度等車嘅都係一班黑人，當佢哋見到我哋嘅時候，佢哋個個都向我哋投以好奇嘅眼光，仲要係望到實嗰隻，比人咁樣望，當然係唔舒服㗎啦，但係如果我哋唔望番佢，又唔會留意到佢哋會唔會有咩舉動，所以都係望嚇左望嚇右咁，扮嚇嘢四圍望，分散不安嘅心情之餘，亦可以留意住佢哋……

（點解架巴士仲未到㗎…）

等咗唔知幾耐，架570終於到喇～～喺車頭仲見到個目的地係「Ystad」，咁即係我哋已經成功闖過所有難關，可以為呢個冒險之旅劃上一個句號。

（望穿秋水終見你）

轉眼間就已經去番巴士總站，見仲有時間，我哋又再四周圍行下，不過唔敢走太遠，因為我哋仲要再行多次Visitor Center嘛。

（Ystad一角）

（Ystad車站背後）

入咗Visitor Center行咗個圈，最後買咗幾張postcard同郵票，難得嚟到呢度，點都要寄番張比自己嘅～～

（Ystad嘅郵票）

而postcard就一定係揀Ales Stenar，因為今日嘅目的地就係佢，而且探險指數極高，一定要為自己留番一d實體嘅記念先得！

（Ales Stenar Postcard）

最後，終於要坐火車離開Ystad番Malmo，望住呢個火車站，真係有少少不捨，因為今日嘅探險之旅，係由呢度正式開始，喺眾多不明朗因素之下，由不安到懷疑，由懷疑到肯定，由肯定到完成，嗰種百感交集嘅感覺，真係好難形容，到最後都能夠一一度過，彷彿好似做完一場戲咁，由序幕、伏線、高潮到戲肉，而去到呢一刻就要謝幕，有少少曲終人散嘅唏噓，亦有一種令人回味嘅懷緬。

我相信我老婆嘅感受應該比我更深刻，除咗我哋一齊去探險，經歷過嗰種高低起跌外，佢為咗今日嘅交通安排，尤其是由Ystad 去Ales Stenar嘅交通安排，佢已經頭痕咗同擔心咗好多日，未出發已經上網check過好多次，但係都搵唔到一個肯定嘅答案，甚至乎到今朝早，就算酒店職員同我哋卜咗車都好，我哋都未能釋懷，再加上個司機遲到，令到成件事情面臨失敗收場。慶幸，最後都可以完成到呢個探險之旅。

（令人既唏噓亦懷緬嘅Ystad火車站）

轉眼間，我哋已經返到Malmo，原來Malmo都有櫻花，只不過係「禿」櫻吧，係光禿禿個禿啊～～有好多櫻花都只係剩番d樹枝…

（「禿」櫻）

（「禿」櫻）

（「禿」櫻）

（「禿」櫻）

影完「禿」櫻之後，我哋去咗舊城區Gamla Staden食飯，今晚要食餐好少少嘅，因為我哋成功探險，而且能夠平安番到嚟，所以要好好地慶祝一下。

（好好地慶祝一下！）

慶祝好簡單，鋸扒加啤酒，夠曬！

（鋸扒加啤酒）

（鋸扒加啤酒）

今餐d嘢食都唔錯，只不過係d waitress麻麻地吧，好似好唔願意招呼我哋咁，一係就扮睇你唔到，一係就扮包大人，想搵個好少少都難，所以再有機會嚟呢度的話，一定唔會再幫襯佢！

食飽之後就慢慢行番酒店，番到上房後，攤上舖牀，再望住Malmo嘅夜景，今日實在係過得好精彩，而呢一刻，我哋都好攰，係時候要休息喇～

（Malmo夜景）

PS. Ales Stenar 係一個極大風，亦都係一個好值得回味嘅地方！