2018 瑞典丹麦芬兰之旅 Day 2 (20180421-29)
(2018年4月22日)
第二天,忍者小灵精mode:又越过高山又越谷……
一早起身食完早餐上咗🦁狮子山(Skansen Lejonet)晨运,再去小博门&🎭歌剧院影住相等Maritiman Museum🛳退役战船开门;第一次深入战舰&潜水艇参观,原来做「潜水」员真系少啲体能都唔掂,爬上爬落一个钟,我都已经脚仔软,莫讲话仲要工作…食完份好咸嘅🍟午餐就去游🛥船河(Paddan Tour),之后行咗个无聊🏛博物馆(Universeum),再回酒店休息到差不多🕣日落,跟住出动到Fish Church (Feskekorka)🐟鱼市场影🌃夜景…返到酒店成身散晒!
经过一夜补眠之后,精神及体力都已经番晒嚟,再加上喺一个舒适嘅环境下叹早餐,wow~~今日一定系美好嘅一日,虽然系阴天,亦无影响到我哋嘅心情!
(天阴下叹早餐)
食早餐时见到出面好似好大雾,心谂今日天气唔好,唔知会唔会落雨呢?既然而家喺度食紧早餐,不如set好部电话影个Time Lapse 啦!
(Time Lapse:云雾中!)
我哋喺餐厅开门无几耐就嚟到,所以无乜人,成场任我哋去行,呢度环境几好,食物种类都好多,可以慢慢叹,真系人生一乐也!
(食物种类选择多)
食饱早餐之后就正式开始今日嘅行程,住呢间Gothia Tower有个好处,就系方便搭车!
(好方便四围去嘅酒店)
虽则方便搭车啫,但系行车方向都要搞清楚先得呢,咁多日以嚟,我哋都搞唔清边个方向先啱,所以次次都要用Google Map揾路,由Google Map话我哋知个方向,然后去揾车站,如果呢个方向唔啱,去番对面车站就会啱!🤣🤣
(我哋经常喺呢度搭车)
今日行程第一站系去狮子山(Skansen Lejonet),呢个狮子山有咩咁特别呢?其实我都唔知,只系上网揾呢度有咩景点时,无意间见到呢个地方,而网上介绍又叫佢做「狮子山」(见下文,我以为系……😅)咁搞笑,所以咪嚟睇吓啰!
由Gothia Tower去狮子山唔难,根据Google Map所显示,落车后就向前行,U-turn,再行一段路就到。落咗车后,都唔觉得呢度有个「山」anyway,跟住地图行啦,途中见到有人用部单车卖广告,招生学「咏春」,当我见到呢个广告时,我不禁地去谂「对于外国人嚟讲,究竟中国功夫有咩咁吸引呢?」,究竟系功夫本身吸引?学功夫嘅心态吸引?定系对中国文化有兴趣?报名参加嘅又有几多人?
(「咏春」招生)
狮子山喺边呢?就系向住单车尾方向行,跟住过马路,过咗马路之后就右手边直行,喺行车天桥底U-turn,咁就目标在望嘞!
(喺行车天桥底U-turn)
呢度就系传闻中嘅狮子山嘞!原来瑞典嘅狮子山同香港嘅狮子山有咁大嘅分别,喺香港,有个山嘅形状好似狮子,所以叫狮子山;瑞典呢?有个小山头,有个小城堡,城堡顶有只小狮子,咁就叫做狮子山,我顶吖!究竟网上边条友叫呢度做狮子山㗎!
去度呢一刻,我嘅意思系打blog嘅呢一刻,我同老婆讲开比狮子山呢个景点坤咗呢件事,佢就同我讲佢就系𠮶个网友,「狮子山」呢个景点系佢改㗎!呀~~
(狮子山就在眼前)
我哋沿住马路上去,行咗无耐就见到右手边有条楼梯,上唔上去好呢?最后我哋都无行上去,因为唔想上楼梯,哈哈~~
(沿马路向上行)
城堡一角有个标记,唔知咩意思,影低就算。
(城堡标记)
当我哋兜咗去正门时,发觉佢无开门,唔通未够钟?咁我哋就上网睇吓佢嘅开放时间啦,原来呢度唔系开放比公众参观嘅景点,可以预先申请搞party或其他function,其间我哋见到有人出入,当时真系有d想走去问佢可唔可以比我哋入去参观一阵,哈哈~~
既然无得入内参观,咁就喺门口影吓相就走,当我哋由楼梯行番落去嘅时候,发现呢度d石头上布满有好多地衣,咁即系代表呢度空气好好啦,咁就要趁机会吸多两啖新鲜空气先,吸呀…吸呀~~
(石头上嘅地衣)
行完狮子山之后,下一个目的地就系Maritiman Museum,呢个时候又系出动Google Map嘅时候嘞!我哋要去番中央车站附近嘅商场Nordstan,然后再行多10分钟左右就到。
当我哋穿过呢个商场时,途经一个好大嘅候车处,有便利店有櫈坐,而且空间感十足,唔系等车只系路过都觉得舒服呀。
(空间感十足嘅候车处)
我哋睇一睇其中一个指示牌,发现呢个真系一个好有规模嘅交通枢纽,可以坐车去斯德哥尔摩(Stockholm),甚至跨境去挪威嘅奥斯陆(Oslo),丹麦嘅哥本哈根(Copenhagen)都得!睇见呢个牌就知道自己几咁大乡里……
(Nordstan系一个跨境嘅交通枢纽)
穿过商场后就向海边行,由于呢一带都有好多修路工程,所以行出海边都唔太容易……几经波折,终于去到海边,眼前呢个地标就系Göteborgsoperan,即系Opera House歌剧院,喺佢门口打个咭就走啦。
(Göteborgsoperan)
由歌剧院行去Maritiman都只系3分钟时间,不过我哋都系一边行一边欣赏下四周嘅景色,所以用咗10多分钟先去到Maritiman。
未去到门口,只系喺佢对面,已经见到好多架战舰泊晒喺度,心情已经变得有d兴奋,因为我从来未试过咁近距离见到战舰,而且一阵仲可以入内参观,正呀!
(Maritiman就喺对面!)
趁住我哋仲未行入去之前,我一定要比个忠告大家,参观Maritiman需要嘅体能都颇高,唔系要你抬搬托,而系要爬上爬落好多楼梯,请睇清楚,系「爬楼梯」「爬楼梯」「爬楼梯」,唔系行楼梯,尤其系参观潜水艇嘅时候,船舱细,通道窄,上落嘅楼梯系垂直嘅,而出入口都比较窄,身形高大或者比较肥嘅人就要注意。
Ok,参观之旅正式开始!
(Maritiman Museum门口)
经过条桥之后就推门入餐厅啦,食嘢同买飞入场都系呢度,可以食饱先行,亦可以行完先食。
(食嘢同买飞都系呢个counter)
买咗飞之后,就可以正式参观,基本上大家都唔洗著救生衣参观嘅,而小朋友就一定要著。
(基本上系为小朋友而设嘅救生衣)
上到去第一个吸引我哋嘅,就系呢个潜望镜,睇戏睇卡通片就见得多,原来个实物系咁嘅,不过唔知个潜望镜系咪比人玩得多,左右扭嘅时候觉得好实。
(潜望镜の初体验)
跟住入咗去一艘唔知咩船嘅内部参观,呢度可以理解到一架战舰点样落锚,虽然我见唔到个锚,但系睇见呢个装置,都可以想像到个锚有几大有几重……
(落锚装置)
行咗一阵之后,终于见到呢度嘅重点 -- 潜水艇!
(潜水艇)
未有咁快去到参观潜水艇,不过就见到另一个有趣嘅设施 -- 浴缸!最有趣系有3个花洒,一个手揸两个淋头,点解会有咁多花洒呢?一个出热水一个出冻水一个装饰?一个洗头一个洗身一个洗脚?真系唔系好明……
(冲凉都好有学问……)
兜兜转转之下,上到嚟甲板就见到呢两枝炮,同埋枝国旗,影呢张相嘅时候,我记得我系想讲为国家战斗嘅军人,点样雄心壮志去保卫国家,但系到打紧字嘅呢一刻,我反而唔想咁样讲…
呢两枝炮令我想像到战争有几可怕,只要按一个制,就会有粒炮弹射出嚟,跟住就有好多死伤,只要战况持续,你又按我又按,结果就系尸横遍野……或许,呢两枝炮曾经为瑞典捍卫国家安全,与此同时,亦可能夺去不少嘅生命…🤧
(炮管下的情感…)
都唔知点解突然转咗做感性mode,都系转番个旅行观光mode好d。
我哋终于嚟到呢只潜水艇嘞!讲起潜水艇,我就想起狙击赤色十月呢套戏,都系讲潜水艇嘅,不其然想起个船舱个画面,究竟现实嘅潜水艇同戏入面嘅潜水艇有咩分别呢?答案原来系无分别:窄!
基本上呢度只系得一条管道嘅空间比人行,身材高大嘅人,系绝对唔适合入嚟做嘅,就用我自己嚟讲吖,虽然身高得6呎,但系要喺呢度工作,我相信我一定会撼穿头,再唔系就系塞住喺个通道口,唔出唔入,要揾人扯住我一只手,然后「卜」一声,我先至可以过到个窿,哈哈~
(潜水艇内)
(要「卜」一声先过到去,哈哈~~)
(潜水艇操作员)
(叫咪!开饭喇饭喇饭喇~~)
(生得高嘅人,系好难喺潜水艇度瞓觉…)
另外一个令我大开眼界嘅,就系呢个鱼雷发射器!原来d鱼雷系安置喺呢度,最多可以装6发鱼雷,如果要作战就会喺度发射,但系d军人同d鱼雷咁近,简单d讲,只要有小小失误,咁就真系一获熟嘞……
(鱼雷发射器)
(鱼雷嘅尾部)
之前同大家讲过嘅「爬楼梯」,终于有机会比大家睇清楚点样去爬。呢条系一条垂直嘅楼梯,出入口有几阔?自己睇啦,如果身型比较庞大的话,我建议你唔好参观潜水艇,我都唔知「卜」唔「卜」到一声咁离开呢个咁狭窄嘅出入口啊~~
(潜水艇内垂直嘅楼梯)
究竟一个比我娇小咁多嘅太太,佢上呢条楼梯又会唔会好困难呢?我相信会容易好多呢,至少唔会「卜」一声先啦,哈哈~~
(预备爬楼梯)
(上咗一半)
(潜水员终于上到水面,yeah~)
整个过程嘅重点唔系爬楼梯,而系出口𠮶条扶手棍,如果无咗呢枝棍的话,会令到爬出洞口嘅困难度增加…
(有枝扶手棍系方便好多~)
或许,大家会觉得用我太太做爬楼梯嘅model,实在感受唔到𠮶份困难,不如今次换上我做model吖,不过就唔系挑战垂直嘅楼梯!今次条楼梯有少少斜度,个出入口阔咗少少。
(换model,再挑战爬楼梯!)
由呢个角度睇落去,个出入口同我两边膊头都差不多咁阔咋。
(出唔出到嚟呢?)
为咗增加难度,我决定孭住个背囊爬出嚟,去到个出入口嘅管道位,真系塞住咗,我个心口要贴住条楼梯,等个背囊够位过,我先至可以爬到出嚟,经过呢个实验,生得高嘅人系唔适合喺战船上工作㗎!
(终于爬到出嚟)
系度仲想讲多件唔听话兼发鸡盲嘅事,话说我哋有一次无跟住个箭咀行,所以有部份地方系重复咁行,行多次无问题,不过要重复爬多几次楼梯,呢个先系大问题啊!所以大家要记住,嚟得呢度就一定要听话,而且要睇清楚指示去行,唔好四围走啊,否则你就………哈哈~~
行完咁多路,包括冤枉路同冤枉梯之后,都系时候食lunch嘞,原本谂住出去出面揾嘢食,但系出到去都系唔知去边度揾,既然呢度都有得食,不如就喺度食啦!
呢度即系入嚟参观时买入场劵𠮶度,呢度嘅食物选择唔多,都系汉堡包同炸鱼薯条嘅选择,埋去counter落order,等一阵就有人送嘢食比你,不过餐具、纸巾同酱汁系要自己攞嘅,全部放晒喺counter嘅左手边。
(等食中…)
(选择唔多嘅餐牌)
老婆叫咗炸鱼薯条,几好食,薯条够多,仲多到食唔晒;而我就叫咗个汉堡包,个包几好食,薯条都好多,不过就劲咸,可能阿厨师哥哥落盐重手咗,所以d薯条都食唔到一半就放弃…
(船上午餐)
回想番今次参观Maritiman Museum,我觉得真系好值得去睇,一个场地,有好多唔同种类嘅战舰比你睇,仲可以入去船舱参观,有d重要爬两三层楼梯先有得睇,真系大开眼界;相比喺香港,想睇军事设施的话,一年只得一次机会,仲要预早几日去排队,而且未必有飞派到比你,所以都系去人哋国家,睇人哋d嘢算啦~
下一站就系番市中心坐观光巴士,同埋观光船游览哥德堡市,去到观光巴士站时,尾班车已经返咗嚟,个司机见我哋企喺个站度指手画脚,佢唔开车走住,等我哋经过架巴士时,好有礼貌咁同我哋「沙冧」,话比我哋知是日尾班车已开,要听日先有得坐,此等服务真系超窝心啊!
(观光巴士站及观光巴士)
无得坐观光巴士,咁咪去坐观光船啰,反正都系行前些少就到,喺网上揾资料时,有人话要预早卜定位,因为太多人参加呢个项目;同样,亦有人话可以即场卜,如果有位,就可以即场上船,而我哋就系即场卜即场上到船。
我哋去到个counter,睇睇个船期,仲有成半个钟先开船,咁咪埋去问佢仲有无位,佢话有,咁就留咗个位比我哋,so easy。
(去黄色牌下面做预约就可以)
其实架船咁大咁多位,应该唔难卜到位吧,究竟网上嘅留言系真系假呢?我就觉得两者都啱。难卜,可能系夏天旺季时间;易卜,相信系冬天淡季时间,即系我哋到访嘅4月。
(架观光船可以接载好多旅客嘅)
上船之后就随便拣位坐啦,大部分嘅人都会拣船头,因为做讲解嘅导游系坐船头,所以我哋拣坐船尾,最主要系唔洗同人迫,仲可以霸埋侧边位放袋,如果系旺季的话,坐边都无所谓啦,相信会坐满晒人呢~
(占据船尾位置)
开船嘅时候,个导游用瑞典文问大家识唔识讲瑞典文,我哋当然无反应啦,之后佢就转台讲英文,之后嘅讲解就用瑞典文同英文交替咁介绍附近嘅景点。我已经唔记得佢讲嘅详情,只系用相机记录番一d特别嘅事情。
(可以旋转嘅桥)
(桥底有足够嘅支撑)
(香港仲揾唔揾到Ericsson嘅电话?)
有部份嘅桥底比较低,大家要坐低先可以安全经过,而导游会预早同大家讲定,所以大家要听话啊,撞烂你个头就无乜所谓,撞烂人哋条桥就有排赔啦,哈哈~~
(过桥前,请坐低)
行完内港之后,佢都有载我哋出海,会路过今朝去过嘅Maritiman Museum,不过呢度要提一提大家,出海嘅呢一段会有d冻,亦有机会被海浪整湿身,坐船头嘅都可以放心,个导游会放两块胶板喺船头遮一遮,而我哋都平安地干身而回,无湿到!
当返入内港后,我哋路经Fish Church (Feskekorka),一个同鱼有关,但系同教堂无关嘅地方,呢度系一个鱼市场嚟㗎!上网揾资料时,发现好多人都影呢度,见佢咁靓,所以我哋今晚会嚟呢度影夜景。
(Fish Church (Feskekorka))
大约一个钟左右,个Paddan Tour就完结,上岸嘅地方就系观光船出发嘅地方,所以唔洗担心比人车咗去第二度。下一站就系去Universeum,哥德堡嘅科学馆,网上嘅评价对呢个科学馆十分之好,一般逗留时间系2-3个钟。
(Universeum)
入到去Universeum,第一件事系搭一架打斜向上行嘅升降机,好让大家由最高𠮶层开始参观,之后就逐层向下走,直至去番地面。开始嘅时候,系参观一d热带雨林嘅生物,其中有一部机系讲青蛙嘅,按唔同制就有唔同嘅青蛙叫声,听完之后我都唔识分咩声系属于咩嘢青蛙,哈哈~~
(青蛙青蛙叫~)
行到去讲蛇呢个展馆后,我哋见到有个大电视播映住一条眼镜蛇,而电视下面就有个金属手板喺度,一睇就知放只手埋去比蛇咬啦,当时怀住又要惊又要玩嘅心情放只手落去…
(玩命の比眼镜蛇咬)
只手一放落去就即刻缩,惊佢咬我嘛,但系条蛇又无郁㖞,我见佢无乜反应,咁就再放只手埋去,2秒后再缩手,又无事㖞;我相信当我再放只手埋去时,应该会比佢「咬」,结果,我再放只手埋去,突然间,条眼镜蛇好快咁向下「咬」咗一啖,再配合埋「池」一声,同埋有风喷落只手度,我就咁比佢「咬」中咗嘞~~
(我比毒蛇咬中咗呀~~)
其实呢个游戏系想话比大家知,眼镜蛇嘅攻击速度系非常快嘅,基本上系避唔到,我再试多次都系避唔到,虽然已经知道个玩法,但系由画面配合埋声音加感觉,𠮶种刺激感真系几好玩~
玩完咗个热带雨林之后,个展馆就转话题讲太空呀,大自然呀,同埋一d小朋友嘅玩意,认真讲,唔系咁啱我哋玩,而我哋亦觉得有d闷,反而身边嘅小朋友就玩得好开心。所以我哋唔洗2个钟就睇完,最后喺礼品店买咗少少嘢就走。
离开Universeum之后,我哋就番酒店小休,今次唔洗搭车,因为酒店就喺对面,呢间酒店有个特点,就系有个空中泳池,喺中间𠮶座有个「L」形嘅玻璃墙,𠮶度就系空中泳池,当时真系有人游紧水㗎!
(有空中泳池嘅酒店)
番上酒店休息咗一阵之后,我哋就去Fish Church (Feskekorka)影夜景兼食饭。去到Fish Church附近时,大约系7:30左右,刚好见到好靓嘅晚霞,见到靓景,当然要影低啦。
(晚霞)
影完相之后,我哋有d肚饿,所以就去揾地方食嘢先,行下行下就见到附近有间寿司店,不过寻日先食完寿司,再揾其他嘢食吧,结果当我哋差不多行完一个圈,都未揾到嘢食,结果都系要去番𠮶间寿司店,正想叫嘢食时,个店员话佢哋已经截单预备收舖,无得坐低食,只可以做外卖,当时我哋实在太肚饿,所以就叫咗个寿司拼盘外卖,但求有得食,是但啦!
等紧外卖时,听到其中一个店员讲广东话,我哋就同佢倾咗两句,仲讲笑咁同佢讲「哥德堡最出名嘅嘢食就系寿司!!」哈哈~~
攞到外卖之后,就走咗过对面马路,Fish Church隔离坐低食寿司,𠮶一刻觉得我哋好惨,天气又冻又大风,张櫈又冻,d嘢食又系冻,再加埋罐可乐,仲有乜嘢可以冻过而家吖!
(晚间「野餐」のFish Church)
食完寿司之后,就到此一游啦!
(Fish Church门口)
(Fish Church对岸)
既然个个都话呢度靓,又用呢个景做postcard,咁我都唔执输,影番一张Fish Church之镜先~
(Fish Church之镜)
影完相之后,就搭车番酒店,执好行李,预备听日离开哥德堡去下一个城市 -- Malmo。