細細粒今次真係做得好好！

最近TVB劇《是咁的，法官閣下》成為網民熱話，除劇情夠新鮮貼地，演員演技亦獲激讚，其中演智障殺人犯「Bell」的細細粒（陳嘉佳），更被網民推舉攞「飛躍進步女藝員」。雖然細細粒在TVB頒獎禮沒有提名，但得到外界認同，她已經好開心，「冇人鬧仲有人讚『原來細細粒係識做戲』，已經好感動。」 

細細粒話自己除了識O氹人開心，其實令人喊仲叻。

細細粒說最初該劇監製找她時，得知這麼多喊戲完全沒擔心，因開正她強項，「我除咗食得，其實仲好喊得，但係咁多喊戲，如果場場一樣咁喊法，觀眾會好悶，所以我有寫低每場喊嘅程度，要有層次先好睇。」她亦好多謝對手陳志健幫助入戲，「佢演『阿鬼』啲兇狠眼神，真係搞到我好驚，加上嗰場分屍戲現場氣氛做得好似，所以好易投入，雖然未斬過人，但有幻想番豬肉檔情況去做。」

細細粒話全靠陳志健演「阿鬼」的兇狠眼神幫助入戲。

細細粒在《是咁的》喊戲極多，但每場有不同層次。

現身在貴州和阮兆祥齊齊為內地劇開工的細細粒，一樣有留意到劇集出街情況，「最初都唔信有咁多人讚，以為係公司幫手做宣傳做得好咋！後尾上網睇真係幾好反應，至少我以前有劇出街，啲人唔係話我肥，就係鬧我唔識做戲，今次竟然見唔到有人鬧，仲睇到人讚『原來細細粒係識做戲』，已經好感動啦！」

近期開始發展內地巿場的細細粒，除參與綜藝節目外，還有拍內地電影《顏值當舖》。

問到會不會覺得沒有提名可惜，細細粒說有人讚當得了獎，「獎項嘅嘢自己唔敢諗，有人讚已經好開心，反而我最想套劇攞『最佳劇集獎』，因為真係一套好有深度嘅劇。同埋希望多啲監製留意到我除咗識O氹人開心，其實令人喊仲叻，我想做多啲苦情戲，最恨演愛情大悲劇。」

呢場分屍戲氣氛好逼真，令細細粒諗起都驚驚。

細細粒最近參與電影《你咪理，我愛你！》，與何遠東有搞笑牀戲。