芷珊：好開心，好有放監feel~

停泊於橫濱的「鑽石公主號」郵輪爆發集體感染新冠肺炎，累計超過600人受感染，不少返港接受隔離人士亦有確診個案。疫症在郵輪集體大爆發前，早於1月20日，黎芷珊在日本橫濱上過該郵輪，5日後抵港，平安落船。不過，回港後得知原來跟80多歲男患者同船，她為人為己主動留家隔離，「閉關」足足一個月。

本週二（25日）芷珊終於安心「出關」，當日《頭條日報》記者野生捕獲她快閃現身九龍灣及清水灣，除了急急去辦點公事外，還到超市補充大量日用品及食物，精神爽利的芷珊姐姐接受電話訪問時興奮道：「好開心，好有放監feel，今次件事真係執番身彩呀！」

自我隔離一個月，芷珊出關後超市狂掃貨，手持兩大袋戰利品打道回府，一臉滿足。

《頭條日報》報道，週二早上11時多，記者在九龍灣mega box停車場內，竟然見到戴住黑超、白口罩，一身黑衣裝束的芷珊獨留車上，未幾有個疑似她眼鏡公司的男員工送來兩袋物件經她簽收。之後她駕車返回清水灣住所附近的超市購物，記者所見，沒有出街成個月的芷珊好似「放監」，在超市逗留近一小時，幾乎每行貨架都看過，對所有貨品都感興趣，最後買了蔬菜、水果、芝士、牛油、通粉、乳酪、雞蛋、牛奶、慄米片等營養食品，還有日用品如洗手液、滴露及貓沙等，期間又細心留意漂白水、消毒抹手紙成份，但就沒有撲到廁紙，戰利品幾乎塞爆個車箱，真是大豐收。芷珊姐姐經過一個月隔離休息，隔住口罩都feel到她精神更飽滿，亦因她包到冚，置身超市都不起眼，所以可以free爆地shopping。

芷珊出關後，第一時間處理公事。

事後記者聯絡芷珊，她愕然道：「係呀！今日第一日出街，所以好開心，有放監feel，幾乎唔識得開車呀！仲買咗夠用個幾兩個月嘅食品同日用品。」黎芷珊延遲隔離期，她強調是自願做法，「見到有啲患者喺14日隔離期後先確診，咁多少都有啲憂慮，更加唔想咁快出街我會嚇親人，提出自我再隔離多14天會較穩陣，跟進我個案嘅姑娘表示支持話『咁就最好啦，肯定冇事！』其實我喺上週六（22日）經已完成曬第二輪隔離，姑娘話係最後一次打畀我話『OK㗎啦！』。喺跟進方面，政府都做得OK，每隔1、2周就有人打嚟問狀況，亦有提供24小時支援服務。」

狂掃至愛的水果、蔬菜，芷珊揀牛油果手勢熟練。

由落船至今，芷珊姐姐無頭暈身㷫，雖然已進入「安全期」，但她仍然關注疫情及其他乘客情況，「原先因為有工作做，所以好好彩咁揀咗個5日短trip，我有朋友旅程較長，搞到一家大細滯留郵輪上，幸好全家驗測結果係陰性可以拎到行街紙，佢哋冇坐政府包機返港，反而選擇留喺日本自我隔離。喺今次事情上，我梗係算好好彩，個個朋友都打嚟，包括楊千嬅話我『死好命！執身彩！大難不死…』其實都係嘅，諗返件事真係好危險，尤其是好似困獸鬥咁將乘客隔離喺密不透風嘅船艙內，咁點會冇交叉感染呢？喺船上嘅隔離做法真係錯到不得了，搞到好多乘客有無妄之災。」

1月20日黎芷珊在日本橫濱上過鑽石公主號郵輪，回港後得知同船有人確診。當日她跟新聞之花張寶華、才子陶傑同行。

芷珊姐姐於下月1日54歲牛一，她預先張揚會響應政府呼籲減少社交，暫停生日飯局，「好多朋友約我食飯，不過我都話心領喇！減少人羣聚集好過啦！一年半年唔慶祝啫。暫時最快3月尾先有工開，喺疫情下經營嘅眼鏡店短時間內營業額係有增長，但整體生意都係差，唔會入咁多貨，宜家成個市都慘淡，但我堅持唔裁員，唔減薪，始終疫情會過去，唔通到時又請返人咁煩咩！反正公司人少少，應該仲頂得住。」

芷珊姐姐在日本玩完再上船返港。

老友楊千嬅都有致電關心。

市道慘淡，好彩有老友陳奕迅力撐，戴她公司眼鏡。

因應疫情，芷珊姐姐不打算今年慶生。

芷珊好細心咁研究漂白水成份。

芷珊姐姐跟周星馳、張國強、譚玉瑛都係兒童節目出身。