35歲的麥浚龍(Juno)和中英混血女友戴庚玲（Janine）10年拍拖，戀情僅維持1年，兩年後又愛火重燃。兩人復合至今一直感情穩定，早前更公開在社交網放閃，非常甜蜜。而Juno的胞兄麥浚翹(大寶)，於16年已為人父，與模特兒老婆李慧思（Cice）誕下孖仔。唔經唔覺，一對寶貝仔已經3歲，爺爺麥紹棠和嫲嫲更是錫到燶，一得閒就帶他們去玩、食好嘢和行街街買玩具，享受一下湊孫樂。採訪：梁志明

Juno同胞兄大寶是圈內潮流教主、行事低調。前者有親密女友，後者就16年做埋爸爸。二人父親為中建置地主席麥紹棠，據講身家至少有10億。平日工作忙碌的麥紹棠，一有時間就會與太太帶兩個寶貝孫去玩。

早前麥紹棠和太太與兩個孫仔及助手現身太古城中心，一行人行去玩具店買玩具，畀完錢，小朋友手上一人拿住一盒細玩具，然後再由助手拎住兩盒大的，收穫勁豐富。當他們在門口商量從邊個方向離開時，麥紹棠趁機回覆message。原本在等座駕期間，兩老諗住再帶兩個孫周圍行嚇，但其中一個孫仔突然扭計，搞到麥生麥太大為緊張，即刻要踎低逗他開心。見時間都唔早，他們便急call司機，數分鐘後，爺爺拖住一個孫，嫲嫲抱住一個孫急急上車回家。