日仔親像火箭砲咻一下恁遽過，係戇詐戇天天過，一日過一日，毋多知仔春天過忒熱天到咧。

上禮拜三盡無閒，朝晨上咧四節課，下晝先去長庚看門診拿驗血單後，緊拚拚仔又坐公車去南京東路二段124號9樓文水藝文中心聽林少英老師個<無菜單音樂沙龍>【閱讀音樂】。

2:00~5:00了後，又盤公車去大直北安路大直國小站下車，行到北安路55號中央廣播電臺，6:30~9:00有一場【黃金客語讀書會】四月份聚會。

行到兩腳痠軟嘴恁燥強強會橫忒，又尋毋著會員，兩三遍行下去地下室[金寶餐廳]，該工作人員講，暗晡夜客滿無接受散客，實在疑狐，仰恁怪奇?像一個癲嫲樓上樓下捩捩轉，打手機仔又尋毋著人，企在餐廳門口膦火還著，目尾仔影著阿月同阿明坐在一樓大廳下，行過去摎下隻月愛準備讀個書擲分佢兩儕，也無管佢兜陪人客在該談哆，講仔兩句發譴個話跋腳斡頭走。

行著劍潭公車牌，看愛轉屋下公車半點鐘後正會來，這央時心情座定派下來，拿手機看line，發現咧大條事頭:家娘有中風徵兆，講暗晡夜無力行上二樓間房睡目，看著這心肝強強會爆忒，仰會今餔日恁多事?

轉到屋下，既經8:00過咧，想起天光朝晨愛抽血檢查，敢做得食夜?電話同在老屋伺奉家娘個老公請教，佢講厥姆天光朝晨正去門診，因爭今暗晡急診無專科醫生，一抹煞佢會處理，毋使煩勞。

其實，透夜有睡像無睡，拜四朝晨去公園拚掃排舞場地後就直接去長庚抽血。續下來一片上課，一片聯絡屋下，原來家娘分先生診斷係[腦部栓塞中風]，愛入院注[活通血管]大笐射，愛入院觀察5日。煞煞當晝下課就去退天光日愛去高雄參加同學會個高鐵票，來回省咧3000個銀車錢，雖然老公講:[一切活動如常]。

拜五當晝一下課拚轉大甲光田醫院，下晝3:00邊仔家娘看啊著當歡喜，精神飽滿講無停，兩子家娘講咧半下晝。等到7:00老公煮一細鑊糜分家娘食，8:00零小郎叔從湖北工廠，經廣州，去香港坐飛行機轉桃園，直接坐火車、竹南盤車到大甲，看哀仔贏過餔娘子孫!

續等3暗晡小郎叔做下擔起掌阿姆顧阿姆個責任，感覺有人分擔照顧，毋係一儕面對，實在當好。

拜四到拜一，5日4夜，老公掌1夜、小郎叔顧3日，拜一當晝就出院轉屋下。阿彌陀佛!好得第一時間得著叔伯大哥、大嫂貴人相助，醫院院長係大嫂外家姪仔，有院長關照，做檢查特別緊板，結果馬上知。

未來還毋知愛仰般來伴陪奉待，至少愛請一個外勞看顧，無斯自家無才調來照顧老者個生活。

一禮拜親像洗三溫暖共樣，關關難過關關過，通霄轉來歸身痠軟痛親像寒著共樣，今晡下晝去長庚家醫科看驗血報告，講還做得[毋使食降血糖個藥仔]。阿彌陀佛!再過半年正去檢驗。毋過，自家就係自家個醫生，自家同自家照顧好，正有能力照顧家人。

*******************************************************

石榴花開又結子:

 

 

 

 

 

長壽花開鬧洋洋: