好恩愛！

關心妍收到鹿仔音樂盒做禮物好開心。

月前40歲生日的關心妍（Jade）與老公楊長智到東京旅遊慶生，難得可以過二人世界，Jade笑言去返曬以前拍拖的地方和餐廳回味嚇！她稱跟老公在備受追捧的ÉdiTioN Koji Shimomura法國餐廳慶祝生日，她又收到鹿仔音樂盒做禮物。而最開心是入住開業三年的富貴溫泉旅館Hosinoya Tokyo，每晚都可以隨時浸溫泉。兩公婆去玩不忘囡囡，在至愛的牛奶妹專門店買了很多手信給女兒心心。

關心妍與老公在東京慶祝40歲生日。

Jade近年去日本多數揀大阪和福岡，因為多地方啱小朋友玩，她笑言：「今次係慶祝我40歲生日，又係二人世界嘅trip，加上我好多年冇去過。」她坦言去返以前拍拖嘅地方及餐廳，好似去新宿必到的伊勢丹及勁多雜貨及個性小店的代官山行街，亦有去她至愛的HI-CACAO CHOCOLATE STAND朱古力店食軟雪糕，她說：「其實今年仲係我哋結婚10週年同拍拖13週年，所以去返呢啲地方，回憶真係返曬嚟。」而楊長智好有心思，特別Book了近年好受歡迎的法國餐廳與她慶祝，Jade食完龍蝦更收到鹿仔音樂盒做禮物，「一拉隻鹿仔會唱生日歌，我好鍾意。」

關心妍和老公到法國餐廳食生日飯。

對於今次東京生日之旅，Jade最開心入住溫泉旅館，「每日行完街返酒店就可以浸溫泉，唔使特登再搭車去溫泉區。」最後她還去了牛奶妹專門店，她直言很喜歡牛奶妹，「我成日諗第時生個女似牛奶妹咁得意就好，果然心心真係有啲似牛奶妹，所以我買咗好多手信畀佢。」叉完電返港，她表示會繼續推動研亮生命基金「願你感恩」兒童文化，「啱啱招募咗百幾個小歌手，嚟緊會出兒歌專輯義賣。」10月和12月她分別在深圳和東莞舉行巡唱，明年就在美加和澳洲，她期望香港能做終點站。

關心妍去返伊勢丹行街，回味無窮。

關心妍表示Hi-Cacao的朱古力軟雪糕，是她喫過最好味的。