資深投資者，無人不識曹仁超，明星級財經分析員也。小弟八十年代認識佢，有空就摸摸酒杯底請教。

老曹看似豁達風騷，但有件事，非絕對耿耿於懷，乃八九年六四，佢曾經忠告讀者：「當滿地鮮血時，就是掃貨良機！」

結果，被N咁多人狂轟佢冇血性！

「智豬，投資之道，應該在人人恐慌、掟貨時掃入實力股，我有乜錯呢？」

結果，當然佢中到開巷啦。不過，以後亦學精 ，懂得照顧公眾情緒，改用「股神」畢菲特式講法：「人人貪婪我恐慌，人人恐慌我貪婪！」

好 ，今時今日，武漢肺炎嚇到全球鼻哥窿冇肉，自然乜心機都冇曬。就香港而言，失業率攀升，有幾個行業肯定短期瓜直。其中之一，正是旅遊業。

旅遊業一謝，相關投資全部插水。其中之一，為旅遊巴士。學校停課，旅客裹足，羣眾活動 旗。呢個時候，邊有人會租旅遊巴士？於是，香港七千部大型旅遊巴，大部分呆在停車場，只有支出（維修及泊車費）而零收入。咁搞法，你話 ，牌價會點？

早在二 四年，政府為控制非專營巴士數目，開始嚴格控制其申請，只鼓勵經營者在市場上採購原有的巴士牌。

消息公佈後，以香港人性格，唔炒到飛起就奇啦。於是，非專營巴士牌由唔多值錢，一路炒高。到二 一八年，癲到三百一十萬（不包車價！）。點解咁？因車牌數量有限，只有七千一百個。但投資者（炒家）憧憬港珠澳大橋一開會旺爆，再加上本已澎澎聲的自由行大潮，故樂觀地估計牌價會升到天咁高。

結果？慘！自由行見頂，港珠澳大橋拍烏蠅。去年中開始，更來鋪席捲全港的政治運動。今年，來多大劑武漢肺炎。於是，大部分旅遊巴「坐監」，炒家損手爛腳，冇收入而要供貸款，咁點？當然 價！

旅遊巴士牌價跌到見血，唔知會去到幾深！實力投資者，可以考慮一到心目中價（？）就買個牌玩下，有專業公司幫你全套打理收租。一旦捱到香港「重光」，有機會賺牌價再賺車租，好和味 ！

(智豬在握)

經濟觀察/投資王