高危時期啊！

新型肺炎疫情嚴峻，令不少父母都非常擔心，陳展鵬囡囡「小豬比」陳諾瑤10個月以來無病無痛，但在大年初二晚突然發燒至39度，搞到展鵬夫婦不知所措，決定漏夜帶囡囡去高危的醫院求診，好彩只是感冒，服藥後翌日就退燒。不少朋友都大讚這位新手爸爸反應快，夠機警！因應疫情，TVB新劇《逆天奇案》暫時停工，展鵬就利用額外假期發放父愛，自爆親子關係更有所提升！

展鵬表示為人為己，出街就要做全套防護措施。

《頭條日報》報道，對於「小豬比」第一次發燒兼且有點肚屙，陳展鵬都一額汗，他憶述說：「之前開工太忙，好多親友投訴成年都未見過『小豬比』，我哋見初二都唔算太凍，小豬比狀態又OK，所以帶咗佢去拜年，見嚇親友兼逗利是，點知即中招，估唔到個女喺豬年都要病一病(2月4日立春纔算屬鼠年) ，其實佢經已好犀利，出牙仔都冇發過燒，可能轉天氣。」

這位新任爸爸表示病毒好犀利，小朋友一不舒服即刻發燒，「其實我哋都唔想做怪獸家長，真係好矛盾，但疫情加流感咁犀利，最怕喺呢個敏感時間出入醫院，好彩醫生夠經驗。原來做怪獸家長都要識做，要因應天氣，唔少朋友都讚我夠機警，話如果再拖遲兩日先去求醫就會更麻煩。」

四年前拎過視帝的陳展鵬，揚言今年要再加油。

展鵬又大讚愛女好掂：「佢性格好硬淨，唔舒服唔會喪喊扭計，反而係咁拍打自己個頭。家我哋盡量避開去人多擠逼嘅地方，唔係驚，係公民責任，既然Feel到情況惡劣，少啲出街相對少咗被感染機會，咁樣疫情就會容易處理，為人為己，出街就要做曬全套防護措施。」

展鵬又指因為不用開工，多了時間享受親子樂，「之前只係喺聖誕節放咗半日假，同『小豬比』去完打針就過咗去添馬艦嘅遊樂場，喺摩天輪下同『小豬比』飛嚇，觀摩嚇爸爸小時候最恨玩嘅旋轉木馬。連續幾個月都要開工，搞到連小朋友都唔認得我，望住我感覺好陌生。最初因為唔舒服連我抱佢都喊，只係可以畀熟悉嘅媽咪同工人姐姐抱，現時餵完藥就攬住佢瞓，攝位發放多小小父愛。」

展鵬帶囡囡去遊樂場玩，摩天輪下同個女玩空中飛人，弄得寶貝女好開心。

新手爸爸展鵬又開心share湊女心得：「個女好乖，唔會扯口罩，因為我會諗辦法氹佢玩住嚟戴口罩，戴咗後再讚嚇佢，影嚇佢，等佢覺得戴口罩係件開心事，但要小心唔好整痛佢。其實小朋友對每樣未接觸過嘅嘢都好新奇，尤其當小朋友想扯走口罩會被彈親，以後就會驚咗唔敢再戴，所以要小心處理第一次。」

講到餵小朋友食藥，展鵬強調「盡量唔好掂到條脷，食完用水沖口，最重要嘅貼士係分開嚟餵，每隔半小時餵一種藥，可能餵藥需時好長，但小朋友唔會咁抗拒。家長們亦留意，要控制自己，因為小朋友只係識睇反應，對住小朋友時面容同語氣都要寬容啲，唔好咁緊張，所有嘢互動多啲，好似做呢行咁要八面玲瓏，就算話佢都要笑住嚟話，哈！雖然我成日『瀨嘢』畀人話黑口黑麪，但對住屋企人梗係唔同啲啦。」

問到有育兒心得的展鵬會不會盡快生多個？展鵬笑言，「我哋呢啲唔會目標為本，要長做長有，享受咗『小豬比』先，反而最大嘅新年願望要喺事業上重新再出發，因為過去年多，喺人生階段裡面做咗好多樣好重要嘅嘢，家所有嘢都settle好，要再努力衝刺喇。」

展鵬難得有半日聖誕假期，實行帶寶貝女出街。

多得爸爸愛心舖排，帶住嬰兒口罩的『小豬比』唔抗拒。

10個月大的『小豬比』非常可愛。

1月14日係展鵬43歲生日，同老婆單文柔簡單慶祝。

一家三口出街。

之前單文柔做跟得夫人，跟老公去泰國拍外景，順便做埋收音師。

之前展鵬生日，《逆天奇案》演員馮盈盈等為他慶祝。

展鵬有一班支持他多年的粉絲。

『小豬比』由媽咪單文柔湊，所以平日會較黐媽咪。