自動獻身配合~

C君和周家怡都有份參與黃子華炮製的賀歲片《乜代宗師》，強調只屬客串身份的C君除了演劉心悠徒弟外，還首度出任電影配樂；而首度跟子華合作的家怡則演子華老婆，她直言勁不夠喉。講到子華賣樓開戲，兩人都大讚對方為電影的付出，C君更忍不住大爆子華「講大話」，因對方完全無剝削他們的薪酬，反而是他們自動獻身配合。

剛做人夫的C君，鼠年願望不是想生B，「希望子華神嘅《乜代宗師》收得，佢回唔到層樓回返啲地板都好呀！」

簽了英皇電影的家怡，希望鼠年可以拍多些電影，嘗試更多不同角色。

《頭條日報》獨家報道，C君雖然演西洋拳高手心悠的徒弟，但擺明完全不識打，「我只可以客串，因為打3拳已經穿煲啦！」而家怡講完自己演子華老婆後笑言：「自己講完都打個冷震！角色係一個好唔周家怡，好自我中心，子華有講到個角色唔係乞人憎，但係好難拿捏。」C君即向她大派定心丸，「你做到好得意，有可愛嘅效果。」

C君和周家怡之前未合作，今次一見如故，C君形容家怡是「被演戲耽誤了的主持人」，仲話好想約埋一齊主持節目。

戲中家怡演子華老婆，還有個囝囝，表面上一家好幸福。

講到初次做配樂，C君自爆事前要接受子華考覈，「好前期佢講咗某啲場口想有隻咩音樂，做到呢幾隻啱心水咪可以合作，不過亦證明佢前期嘅前期已經諗緊後期，佢自己又要演，你話佢每日要諗幾多嘢。」

跟心悠學西洋拳的C君，還會同細細粒有對手戲。

C君除了任電影配樂，也跟子華和陸永合唱主題曲《上善若水》。

提到子華今次為這部電影賣埋樓，家怡話好仰慕，「佢愛電影愛到咁樣，要去到賣埋層樓，同埋佢唔係想講呢件事出嚟，係迫不得已先咁做。」問到兩人事前知不知賣樓一事，家怡說：「佢有講佢投資，我當日係同公司講，呢套戲係子華自己畀錢嘅，我好想拍，佢開咩價錢都OK。」

資料圖片

C君更加忍不住要玩踢爆，「佢只係話佢自己畀錢拍，但係佢賣咗樓可唔可以收平啲，佢冇咁講，冇講下一句，所以佢段YouTube片係講大話，講到自己剝削啲臺前幕後，所以唔係佢剝削我哋，係我哋自己配合佢。」

今年首度派利是的C君，跟太太黃天頤已準備了5位數字封利是。