如看不到 請到Youku

歌手胡鴻鈞（Hubert）去年拍劇時墮下撞傷頭部休養大半年，相隔超過一年時間，推出自己有份創作的新歌《沒身份妒忌》，直言感到十分興奮！新歌內容講對以前的女友感到悔疚，問到Hubert屬於什麼類型的男朋友時，他直言對女友會十分關懷：「我有信心講我會擺好多心機同時間喺我另一半身上。」

胡鴻鈞（Hubert）透露新歌《沒身份妒忌》是2016年時與好友蘇道哲一起寫的：「事隔差不多4年終於可以推出，好似我哋當年的心血終於可以同大家分享！所以對我來說特別有意義，亦都好開心歌曲推出冇耐，喺唔同平臺或坊間都聽到好多正評，對我來講都係一支好大嘅強心針。」

新歌《沒身份妒忌》所講的，Hubert相信大家都會遇過：「就係你有啲後悔想當年同另一半一齊時冇做得好。即係當年同佢一齊時唔係好識珍惜，可能因為年紀仲輕，對談戀愛呢件事未係有一個好深入瞭解或者未係好認真。然後過咗一段時間你慢慢成熟，慢慢長大，回顧當年嘅關係，心入面有一種悔疚。」

MV中，Hubert有兩個造型，其中飾演一個暴躁的男朋友，他笑言雖然大家對他的感覺是斯斯文文，不過現實的自己都有這一面：「都有脾氣唔係咁好嘅時候，應該每一個人都有呢一面，但係我好少喺鏡頭前面演繹呢一面，但亦都好順利地拍攝時基本上都一Take過。」

問到屬於什麼類型的男朋友，Hubert直認自己對女友會十分關懷及體貼：「我會幾顧及另一半感受，我唔敢講係完美男朋友或者100分男朋友，因為我相信世界上係冇呢樣嘢！只可以不斷進步同埋不斷去變好。但我有信心去講我會擺好多心機同時間喺我另一半身上。」

去年拍《降魔的2.0》時墮下撞傷頭部要休息半年，新一年Hubert笑指自己首先要強身健體！而在音樂方面，Hubert表示會繼續勤力一點寫多點歌：「希望未來的作品有多啲自己創作嘅部分。」