加油香港電影！

電影《十年》導演周冠威最近在新作《幻愛》以精神病患者談戀愛為主題，該片男、女主角劉俊謙和蔡思韻更憑電影剛奪得「香港電影評論學會」最佳男、女演員。電影源自導演06年拍的一套短片，資料蒐集過程令他明白大眾對精神病患者的不少誤解，決定將故事拍成長片，但坦承搵女主角不易，直至遇到蔡思韻。對於外界睇好金像獎獲提名，蔡思韻未敢想太多，認為若有提名是很大肯定。

周冠威希望電影令更多人瞭解精神病患者，從而減低誤解和歧視。

周冠威為短片資料蒐集時，社工轉介了不少個案令他好難忘，觸發他寫今次故事，「個少女係精神分裂症病人，佢好鍾意彈鋼琴，但幻覺每次放對手喺琴鍵就有人用刀佢，我就問佢『咁唔合邏輯嘅嘢都信？』佢話呢個就係病。而另一個康復者，佢結咗婚生埋仔，我又打個突，佢都可以結婚生仔？雖然係個愚蠢嘅問題，當時自己確實係無知。但佢嘅另一半係點？佢幾時同人講有呢個病？每一個佢哋嘅愛情故事都有呢個關卡，好似電影嘅宣傳語句『你介唔介意呀？』佢哋嘅愛唔係一般，會多啲付出同接納。」

26歲的思韻，臺灣國立臺北藝術大學戲劇系畢業，曾參演臺灣電影《返校》。

雖然周冠威寫了劇本多時，但一直未開拍原來因搵唔到女主角，「講真2006年有第一稿劇本，到依家先拍，除咗創作同資金上困難外，係未搵到女主角，（06年時思韻仲好細？）上天安排我等緊佢長大，哈哈！」

導演周冠威睇好思韻憑電影奪獎，果然她先拔頭籌得到「香港電影評論學會」最佳女演員。

戲中思韻和劉俊謙由心理輔導員和精神病患者關係，到發展一段疑幻似真的愛情。

對於外界睇好獲金像提名，思韻未敢想太多，「作為第一套香港電影，我的確遇到好有發揮角色，只諗做好，冇諗過透過咁攞獎，如果咁幸運有提名會好感恩，係個好好肯定，但唔敢諗太多。」不過周冠威好希望思韻跟劉俊謙有好成績，「講得誇張啲，對個巿場都係有需要，呢個香港巿場需要明星，需要年青嘅男女演員，導演幾好都好，但觀眾睇嘅都係演員。」

思韻戲中演心理輔導員，拍攝前為角色做了大量資料蒐集。

思韻和劉俊謙因今次合作而撻着，兩人日前公開戀情。

思韻（左二）令觀眾認識的作品，肯定是17年跟陳奕迅合作ViuTV劇集《短暫的婚姻》。