「Linda有事業、有家庭係我人生努力目標。」

入行6年，27歲嘅鄧佩儀（Gloria）夠乖，形象又討好，被TVB力捧成為上位小花。今年臺慶頒獎禮更憑《金宵大廈》、《鐵探》獲女配及「飛躍進步女藝員」獎提名，Gloria形容女配強敵當前，陳瀅、馮盈盈及龔嘉欣等個個樣靚身材正，自問係陪跑；就連「飛躍」對手張曦雯及湯洛雯等都好強。不過她直言，拎「飛躍」獎係佢呢刻嘅夢想。

當年鄧佩儀去過偶像鍾嘉欣屋企作客，嘉欣仲煲靚湯招呼她。而她貼樣靚身材正的張曦雯係今年的「飛躍進步女藝員」得主。

去年鄧佩儀跟張曦雯、湯洛雯及麥明詩齊角逐「飛躍進步女藝員」，最後輸咗畀馮盈盈，今年Gloria再接再勵爭逐該獎項，但就冇乜信心：「入到5強都當贏，尤其張曦雯咁勁，既有靚樣，又有演技，仲有埋身材，冇得輸！」Gloria又自爆：「芸芸飛躍女藝人中，最有印象係鍾嘉欣06年攞飛躍獎，佢手持飛躍獎項呢張相一直貼喺我客廳嘅願望掛板上，代表住拎飛躍獎喺目前想實踐嘅其中一個小願望。」

鄧佩儀三圍有33-23½-33，有樣有身材，一啲都唔輸蝕過張曦雯。

感激鍾嘉欣
問到其他心願，佢話希望今年可以去到巴黎。「雖然我仲未攞到飛躍獎，但叫做有些少關連，算係同鍾嘉欣之間嘅距離又行近咗一步，咁都好開心㗎嘞。Linda有事業、有家庭係我人生努力目標，佢嘅工作及待人態度令人欣賞。當年佢知道我同樣係溫哥華返港選美，佢特別照顧我，更招呼我去佢屋企食飯，煮咗好味嘅梅菜蒸肉餅、蒸魚同炒菜等，當年我拍處女劇《點金勝手》，嘉欣都有畀意見。」至於角逐女配，Gloria自言更有難度，論資排輩真係要磨練多幾年，待完全掌握到演技先有機會：「我睇好陳瀅嘅《福爾摩師奶》，因為佢個角色有多重人格，亦正亦邪係我最想嘗試嘅角色。」

Gloria喺《金宵大廈》演晴晴，期間同充氣娃娃「Mary」調換角色，扮吹氣公仔 入型入格。

《鐵探》中，Gloria飾演臥底探員，與惠英紅有好多對手戲。

陳瀅演嘅《福爾摩師奶》，角色有多重人格。

鍾嘉欣2006年攞到「飛躍」獎，鄧佩儀視為現階段嘅小夢想。