蘇康有仔萬事足！

以往蘇永康（蘇康）在社交網站都是曬潮物、和朋的合照等，不過，自2017年囝囝蘇展弘（Jazz）出世後， Jazz的萌照幾乎攻佔整個Instagram，轉眼間寶貝仔已經兩歲多，蘇康一得閒就會帶住囝囝周圍飛，見慣世面的Jazz都好活潑，完全不怕生。

趁聖誕長假期，蘇永康夫婦帶了囝囝去泰國玩，Jazz仲好勇敢同長頸鹿零距離接觸！

現年52歲的蘇永康與任職Alexander McQueen亞太區總經理的馮翠珊（Anita）結婚五年，兩年多前終於迎來人生第一胎，蘇康升呢人父後都變得好黐家，一放假還會一家三口周圍飛，好似上月就先後帶囝囝去泰國、日本玩，但近期武漢爆發不明肺炎，蘇氏夫婦則選擇留在香港，日前兩父子還陪媽媽去做正經事，惜本地亦陸續發現懷疑個案，導致全城瘋搶口罩和消毒產品，但他們仍未有做任何安全措施，照一家大細「冇罩」去鬧市。

之後一家三口又去了日本旅行。

當日戴上黑超、Gel曬頭的蘇康，陪太太Anita到中環置地廣場的分店處理事務，同行除了有囝囝Jazz和工人姐姐外，兩公婆還兼顧「託兒服務」幫老友湊細路。甫進時裝店，Anita便找女職員坐低密密斟，蘇康則自己一個行開睇衫及鞋，而兩個「小豆丁」就當正舖頭是「遊樂場」，在裏面瘋狂追逐亂跑自娛一番。

蘇永康（左）早前做「湊仔公」帶埋囝囝Jazz（左二）同老友個仔，陪太太 Anita（右）落舖處理公事。

其間蘇永康趁機在店內逛嚇，點知兩個Ｂ仔開始玩到失控！

豈料玩到High過龍，笑到見牙唔見眼的Jazz竟然一支箭衝了出門口，嚇到工人姐姐即刻衝出去捉住「小主子」，蘇康見狀都急步上前抱回囝囝，但錫到個仔燶的他又怎捨得鬧對方呢？於是「被捕」的Jazz遭「押」回媽媽身邊，然後被媽媽「哦」了兩句。見心肝椗不開心，蘇康都好肉痛，出手拉住掙扎逃脫緊的囝囝，安撫一下對方小心靈，殊不知囝囝不太領情，還一手揈開爸爸隻手！

囝囝Jazz仲「密室逃脫」成功，好在工人姐姐眼明手快捉得住！

被迫坐定定的Jazz不斷掙扎，蘇永康即拉一拉囝囝手袖，結果遭對方揈開。

之後，Anita就出動「電子奶嘴」，Jazz隨即拿着iPad坐定定在沙發上，靜心欣賞至愛的卡通片。為了令囝囝加倍開心，「廿四孝爸爸」蘇康更一度走到附近的Coffee Shop買Puff和牛角包哄Jazz，折返時裝店時，沿途還見到一個同囝囝差不多大的可愛妹，蘇康都忍不住邊行邊笑住回頭望，不知道是否想追個囡囡呢？

最後Anita用iPad利誘囝囝乖乖坐低睇卡通。

勁鍾意細路的蘇永康望住人哋個仔都好開心。

其後，蘇康和Anita忽然留下Jazz，抱住朋友個仔離開，原來他們只是行去育嬰室，估計小朋友整濕片片，果然盡責！

蘇永康幫手抱人哋個仔去換尿片，果然係「多功能爸爸」。