智叔咁好演技，大家都好想再係大臺睇到佢的演出。

廖啟智(智叔)拍完TVB劇《律政強人》後就「功成身退」，他3年前以自由身形式回巢，問可會重返TVB孃家時？他卻半帶笑說：「嘩！TVB(邵氏) 30幾億點擊率O架喎，我拍嗰啲邊有，而且我電話無電，收唔到call，我O依家排緊隊等報名(拍劇)，但條隊好長。」他表示好滿意自己拍過的《刑事偵緝檔案III》，望一眾演員合體再拍。

智叔話當年佢係TVB爆騷王，一年做足354個騷，長期Keep住無得瞓。

《律政強人》係智叔同TVB合作最後一個劇集，雖然捱更抵夜好辛苦，但他都好投入。

之前智叔跟劉心悠和吳卓羲等拍電影《再見‧女人街》，該片展現本土情懷，圍繞女人街一日發生故事，好貼地。片中飾演賣衫佬的智叔都有追逐、打鬥動作場面，他說：「女人街唔係陪住我成長嘅地方，因為嗰度賣潮嘢較適合年青，O依家變埋旅遊勝地就更加少去，今次我見到有好多科技嘢，連望遠鏡都有售。」

離開大臺後，智叔幫港視拍過《警界線》獲好評，該劇早前在香港開電視重播。

新片《再見‧女人街》中，智叔演賣衫佬。

儘管智叔無大臺遮蔭，但做到無停手，他笑說：「工作一般多啦，總之keep住有得做，上半年仲爭5部就拍到10部，(咁咪豬籠入水？)豬籠唔密會漏走啲水，浸豬籠仲會死人。」智叔暫時同TVB未「聯絡」得上，所以無意重返拍劇。對於今年勁收30點的TVB劇《BB來了》，他則說：「呢部戲掂！BB真係好戲O架，表演係最自然，鏡頭前有BB，焦點經已落曬落去，後面做乜都冇用！乜人都叫BB，李佳芯吖嘛！佳芯有個佳字梗係咩(掂)啦，我同佢合作過《律政強人》，當年佢鞭策得我好勁O架。」智叔最慨歎好難拍返《刑事偵緝檔案III》呢類好劇：「呢個系列真係好睇，觀眾都係比較鍾意我哋呢啲上一代演員，只要keep住對工作熱誠，再合體會有得做。」

智叔拍ViuTV劇《已讀不回》，與劇中演員陳希俞、羅家英、黃心美等玩得相當投契。

李佳芯和黎諾懿擔正的TVB劇《BB來了》，廖啟智指BB最搶鏡。