好恩愛～

十二月八日，係劉嘉玲嘅五十四歲生日，佢喺社交網分享咗一張慶生照，望住個蛋糕同埋有如煙花嘅蠟燭，笑容甜美。其後，佢透露生日當天同老公梁朝偉二人世界靜靜度過。問到偉仔送咩禮物畀佢？佢忍唔住笑哈哈話：「好大卡。」

網民喺日本嘅茶室巧遇偉仔，因為唔想打擾 偉仔，所以靜靜偷拍咗幾張相。（《東週刊》圖片）

歎茶期間，偉仔跟坐對面嘅張學友，傾到好起勁，雞啄唔斷仲傾到笑曬口添。（《東週刊》圖片）

（《東週刊》圖片）

據《東週刊》報道，究竟老公送鑽石戒指定係鑽石頸鏈？劉嘉玲就拒絕透露；不過，佢就表示，聖誕會同偉仔再去日本滑雪。佢又打趣話，到時可能跟唔上對方，所以兩公婆會分開滑喎。

講到去日本，現年五十七歲嘅偉仔，真係有如返鄉下一樣，去得好鬼頻密嚇。早前就有內地女網民，喺東京嘅一間茶室野生捕獲偉仔，仲立即捉緊機會偷影佢添。雖然，呢位女網民事後先知道同偉仔一齊歎茶嘅，原來係歌神張學友，自己竟然走漏咗眼，影唔到學友，因此而呻笨；之但係女網民可以一次過，巧遇男神與歌神，都忍唔住大讚自己，實在太幸運喇！

學友與偉仔夫婦老友鬼鬼，三人經常聚會，但估唔到仲相約出埠歎茶噃。（《東週刊》圖片）