十大女仔唔满意身体部位 眼居然只系排第十
永无休止嘅追求！我要再靓D！
女人不嬲爱靓唔爱命，大部份女仔都贪靓，除咗着靓衫靓鞋之外，希望将自己每一个身体部位都做到最佳状态见人，都系好重要嘅一个环节，今日DailyView就用网路大数据带大家睇吓十大女士最在意嘅身体部位，你平时有冇留意呢？
DV小教室：网路温度计透过《KEYPO大数据关键引擎》，观测、爬梳港澳地区近万个网站、频道，其中包括新闻频道、各大讨论区、FB、IG以及Blog，从中取得资料样本数，并以AI语意程式作数据分析。「网路热度」为主题项目相关的网路posts和comments ，数值愈大代表主题项目的讨论度愈高。
10 我见犹怜桃花「眼」（371笔）
眼睛被称为灵魂之窗，曾经有美国嘅网络媒体做过街访，访问路人见到陌生人第一个部位会望边，超过九成人都话系眼睛。以前大家都觉得要双眼皮，又圆又大嘅眼先至系靓，不过其实慢慢大家都已经对靓女嘅定义都已经好唔同，特别系一啲单眼皮嘅女明星都好有个人特色，一样系好多人心目中嘅女神。
image source:Youtube/ M2
9 靓女必备高挺女神「鼻」（533笔）
麦玲玲都唱过：「鼻头好有肉，内心就无毒。」面相学嚟讲，鼻系好重要嘅一环，鼻头有肉代表富贵，但大部份嘅人都希望拥有一个又高又尖嘅欧美靓鼻。为咗改善个鼻，唔少女士都会去微整形，透过打针、埋线等等，务求达到最完美嘅效果，不过每个人嘅面形五官比例都唔同，千祈唔好盲目跟随明星嘅五官摆落自己块面呀。
image source:Youtube/ M2
8 唔开美肌都有完美「皮肤」（759笔）
打开Instagram见到个个明星嘅皮肤都好似剥壳鸡蛋咁样又白又滑，真系羡慕死人呀。要拥有靓嘅皮肤除咗天生丽质之外，平时嘅保养亦都好紧要，做好防晒，挑选适合自己嘅护肤品，而唔系随便跟风买。虽然大部份嘅女仔都好重视美白，不过其实健康肤色一样都可以好靓，大家都唔需要太过强求啦！
image source:Youtube/ 솔라시도 solarsido
7 尖到拮亲人「下巴」（794笔）
当修图软件发展得越嚟越成熟，已经唔可以相信网上「照骗」，因为好多时候美颜效果都开得十分夸张。平时一班人自拍，好少人自愿企喺最前面揸机，女仔最怕面大，大家都想有尖下巴、V面，呢样野除咗靠后制修图之外，打针喺下巴都已经好普及，亦有好多女明星都有去整骨，所以话呢女仔为咗靓真系乜都做得出㗎。
image source:Twitter / @EXIDofficial
6 孔雀开屏「眼睫毛」（1691笔）
想拥有好似公仔一样，又长又浓密嘅眼睫毛，以前就话要靠黐假眼睫毛姐，而家唔少人都直接去植眼睫毛，除咗唔需要每日拉扯眼皮，怕搞到个眼皮都松晒之外，即眼睫毛亦都方便得多，效果亦都更加自然。幻想吓，每朝一瞓醒一照镜，就见到自己拥有浓密卷翘嘅睫毛，就算唔化妆个人都精神好多，拥有一对迷人的电眼话咁易！
image source:Vlive / Red Velvet
5 挑战人体极限细「腰」（1978笔）
女仔日日都话要减肥，追求S型曲线，水蛇腰就系好多女士嘅梦想啦。韩风时装好多衫都系露腰短版，无返咁上下自信都着唔到出街！睇到咁多韩国女团成员都拥有又幼又有肌肉嘅靓腰，真系羡慕又妒忌。Coffee林芊妤喺YouTube教瘦身嘅片段，最高点击嘅都系练腰嘅片，就知道大家对于苦练蚂蚁腰嘅决心有几大啦！
image source:Youtube/ TEEPR 推一波
4 逆天大「长腿」（4232笔）
有人话「夏天，为大地带来美腿」，其实点只夏天，唔少贪靓女士一年四季都会著短裙、短裤，咁又系呀，有本钱怕咩show㖞，几多度都未惊过，最怕就系着出嚟唔够靓！女士们都希望拥有一对名模长腿，除咗脚要够长，腿形都好讲究㗎！好多女仔都咬紧牙关勤力做Gym，就系希望可以练出一对瘦长直嘅筷子脚。
image source:Twitter/ @ygofficialblink
3 胸怀大志「事业线」（4968笔）
好多媒体成日会将女性胸部形容为事业线，追求S型身材嘅女仔，当然都好在意自己胸部大小同胸型。有人话减肥第一个瘦嘅位置就系瘦胸先，虽然都有人会选择隆胸改善外在美，但坊间可以睇到好多健胸操，透过拉伸同按摩动作疏通淋巴同锻炼胸部肌肉，开刀呢啲有风险嘅事就要三思而后行啦。
image source:Youtube/ TEEPR 推一波
2 化妆新手最大难题「眉毛」 （5588笔）
成日话人好眉好貌，一对好眉对外表真系可以有好大影响㗎。眉毛产品推陈出新，由最基本嘅眉粉、眉笔，到之前引起过话题嘅眉毛印章，可以话系为咗一对靓眉出尽办法。画得好可以改变五官比例，画得衰就坏咗成个妆，对于手残嘅人来讲，要画得对称真系唔容易。所以好多人都会选择并永伴永久化妆亦即系纹眉雾眉，方便、悭时间之余亦都无需要再为眉毛烦恼呀嘛。
image source:Youtube/ 沛莉开箱中
1 唔可以放过嘅小细节「指甲」 （8053笔）
好多女仔细个嘅时候都有玩过指甲贴纸，可想而知指甲绝对系女仔由细到大都好在乎嘅地方。传统嘅指甲油要等成个几钟头先干，其实都几浪费时间，所以而家大部份女仔都会去整Gel甲，快靓正吖嘛！唔好睇小指甲一个咁细嘅地方，女仔都钟意影相，无论系show食物定化妆品，手都会成日上镜，有靓嘅指甲绝对可以为画面加唔少分！而且指甲造型都会令成个人嘅outfit更完整！衬好成套再post返个#ootd，掂晒！
image source:YouTube/ Hana Tam
【香港网路温度计调查结果之图文，未经授权请勿转载、改写】
分析说明：
本研究资料由《KEYPO大数据关键引擎》提供，分析时间范围为2019年03月18日至2019年03月16日。
网路大数据系统观测港澳地区上万个网站频道，包括新闻频道、Facebook、Instagram及各大讨论区、BLOG等，针对讨论『女生不满意的10大部位』相关文本进行分析，并根据网友就该议题之讨论，作为本分析依据。
本文分析之结果，非参考投票、民调、网路问卷等资料，名次仅代表网路讨论热度大小，不代表网友正负评价。
推荐文章︰
十大香港热门「奶爸」！古巨基、周柏豪都唔系第一！
欧美防疫让人看不下去！网友推「全世界该学这三个亚洲国家」
