去四星級酒店High tea！藍莓慕斯蛋糕+雲呢拿雪糕配港式雞蛋仔！

好多人都鍾意食藍莓，唔只因為營養價值高，而且藍色仲畀人一種浪漫嘅感覺，好多甜品都會加入藍莓，非常受女士歡迎。呢間位於佐敦嘅四星級國際酒店，入面嘅Tasca Bar最近就新推出咗一款「藍莓雲呢拿下午茶」，運用淡淡嘅雲呢拿香味，突出新鮮藍莓嘅清甜味道。成set下午茶嘅甜點包括有藍莓慕斯蛋糕、意式奶凍、藍莓雲呢拿撻、法式焦糖燉蛋、藍莓紙杯蛋糕，仲有最受香港人歡迎嘅港式雞蛋仔配雲呢拿雪糕。鹹點方面就有黃金薯蝦同迷你和牛漢堡，再加兩杯自選飲品。喺一間四星級酒店入面享受以藍莓為主題嘅下午茶，真係諗下都覺得浪漫呀！

▲藍莓雲呢拿下午茶($268/2位，另加一服務費)，有齊甜點同鹹點，仲有兩杯自選飲品，供應時間係每日下午3點至5點半。

▲藍莓慕斯蛋糕，紫藍色嘅慕斯，入口軟滑，加埋藍莓嘅香甜，真係睇見都流口水。

▲港式雞蛋仔配雲呢拿雪糕，雞蛋仔係好多香港人嘅至愛，雪呢拿雪糕又係唔少人都鍾意嘅口味，兩樣嘢加埋襯到絕。

▲藍碟花檸檬冰，客人可以叫呢款飲品，口感清甜，同其他甜品同鹹點都好夾。

香港九龍諾富特酒店 Tasca Bar

地址：佐敦彌敦道348號香港九龍諾富特酒店1樓

電話：3965 8789

營業時間：12:00nn 01:00am

「藍莓雲呢拿下午茶」供應時段：每日3:00pm 5:30pm

文字來源：香港人遊香港/ 圖片來源：@香港九龍諾富特酒店

這篇文章 佐敦下午茶：【去四星級酒店High tea！藍莓慕斯蛋糕+雲呢拿雪糕配港式雞蛋仔！】- Tasca Bar 最早出現於 香港人遊香港。