【婚姻合伙人】孝順女高海寧一生為家庭努力：只有屋企令我最舒服
現正播映的《婚姻合伙人》廣受好評，不少觀眾都讚賞其貼地題材，而此劇亦是高海寧入行11年首次擔任女主角，不少觀眾都大讚佢在劇中演出自然。高海寧在劇中飾演貝競枝，自小因被爸爸拋棄而痛恨他，更形成其拜金貪錢的性格。不過，現實中高海寧是個孝順女，她永遠把家人放在首位，一有時間就會陪家人！
撰文：Kammy｜圖片來源：高海寧Instagram，高海寧weibo
高海寧首次擔任女主角
現年32歲的高海寧，2008年參選香港小姐入行，至今已經11年。《婚姻合伙人》是她首次擔任女主角、飾演地產經紀貝競枝（Kimchi），是一個進取女人，既貪錢又自私，不少人都大讚高海寧在劇中發揮得好好，入形入格，就算拍喊戲都十分自然。
孝順女高海寧 父母永遠排第一
高Ling在南京出生，因父母居港工作，所以由外婆湊大，雖然父母不在身邊，但親戚朋友都很疼愛她。由於寄人籬下，所以高Ling自小很懂事，每次放學回家都會自動自覺做功課，小時候成績還很好！14歲時，高Ling回港升中，終於可以和家人一家團聚，中五會考更考獲22分佳績，更做過學生會副主席！真是乖乖女啊！
延伸閱讀：
【親子好去處】讓鐵閘說出社區小故事
【濕疹BB啱飲】自家製袪濕定驚茶
為母親參選港姐
高Ling 是參選港姐入行的，原來她原本是不願意參選的。她指媽媽兒時的夢想是做歌手，大概由17歲開始，媽媽就跟她說：「女兒，參選港姐吧！」，每年不斷重複，直到2008年父親也加入游說的行列，叫她嘗試一次，其實她真的不想參加，因為她認為很多佳麗也是從海外回港的，假如落選也可以回到原居地，但是有很多因素令自己卻步。最後為了圓雙親的夢想，便放手一試。
高海寧買樓 與父母同住
高海寧 在2015年斥資約526萬，購入油塘新盤Peninsula East一個522呎中層兩房單位，當時花上約105萬付首期。屋苑的管理費亦非一般的貴，比當初預期的高，要逾每方呎4.1元，高Ling直言呻貴。 不過，高Ling都唔理咁多，話晒第一次做業主，又有了自己的安樂窩，相中的她大舉V字手勢，依然滿足！高Ling上車之路不易，足足儲了七年錢才完成心願。高Ling曾經話，她一家人都不太會投資，又覺得風險很大，所以自己工作儲錢買樓自住。
乖乖女 愛錫婆婆
高Ling工作向來不錫身，毫不吝嗇大晒豐滿身材，是不少人心中的性感女神。但作現實中是一個非常孝順嘅乖乖女，時常惦念遠在南京的婆婆，就算要拍劇的時候都會趁空檔跟婆婆視像通話。放假時，更加會飛返去南京探婆婆，仲話見到婆婆的笑容就乜都值得！
早前中秋佳節，高Ling於IG上張貼出兩張與外婆的合照曬恩愛，照片分別於21年前和現時拍攝。從合照看，高Ling不論兒時或長大後都同樣愛錫婆婆，就如佢所說，二人的確是「彼此的一生中最愛」。每次一談起外婆，高ling總顯得特別感性：「你陪我長大我陪你到老」，亦祝福婆婆健健康康，可以繼續陪著佢，這份跨越兩地的婆孫情實在教人感動。
高Ling由細靚到大，絕對是天然美女，而高Ling婆婆有乖孫陪伴過中秋亦十分高興。
家人永遠第一位
高Ling 把家人放在首位，每逢大時大節都一定將時間留畀家人，聚埋一齊食飯，更不時於網上分享家庭照，非常孝順！
高海寧：唔介意封胸失去一啲job
家人有無介意你行性感路線？
對於我爹哋媽咪嚟講，我永遠都係佢哋個女，佢哋冇介意過我行性感，因為佢哋知我唔係一個大家外表上望到嘅女仔，因為性感呢個形象可能令好多人誤會我係壞、私生活唔檢點，或者鍾意釣金龜，但我爹哋媽咪好清楚我係一個點嘅女仔，我亦都用行動去證明畀大家睇我係一個點嘅女仔。所以當我遇到奇怪嘅新聞，我爹哋媽咪會同我講：「阿女唔使理，做好自己，遲早有日會睇到嘅！」當出面遇到好多壓力，淨係得屋企呢個地方令我最舒服。
大家都將注意力放喺你嘅身材上，你覺得有冇壓力？
當然有啦，我得到大家嘅注意力，諗起高Ling就諗起性感，但亦同時間限制咗我嘅演藝生涯好多、好多年，近年因為田蜜(《不懂撒嬌的女人》)或者《使徒行者》，一啲好嘅角色令到大家對我印象開始扭轉，監製開始會畀機會我，畀啲重戲份啲或者有得發揮嘅角色畀我，好衷心多謝佢哋。
大眾將我同白健恩嘅強姦戲放大，在於我嘅立場，我梗係唔開心啦，嗰套劇之前我好多角色都係客串小三、狐狸精，監製同我講佢睇我嘅飲食節目，見到我講起婆婆嘅一段說話，feel到我內心有其他嘢可以畀人發掘，所以願意畀機會我，但外界只會將性感放到好大，所以我嗰套劇所有嘅努力都比嗰場戲冚晒。就係嗰刻我開始諗係咪要收起性感。
收起性感後，成效係點？
有好多唔同嘅聲音，有人會話：「大家都覺得你係性感嘅，依家好多女仔都願意性感去引起人注意，點解你要收起啫？你會少咗好多工作機會。」但我覺得每個人都會有個階段，我知道性感可以令我得到好多工作機會，但我希望我可以跨過呢個階段，去下一個階段，得到唔好再咁性感嘅工作機會，我唔介意有一段時間我可能會失去一啲job或者角色，因為唔跨過，永遠都唔會有進一步嘅路、行得再遠啲。
選港姐患抑鬱症
08年你選港姐落選，但無綫簽你做藝員，算唔算賽翁失馬，焉知非福？
嗰陣選完都迷茫嘅，因為唔知自己究竟想要啲咩，當時公司畀咗offer我，我係好開心嘅，起碼呢條路我仲有得選擇行落去。都有同屋企人討論過，因為我書未讀完，未讀完大學，當時諗不如趁後生試咗先，就簽咗，都好好彩，即刻就有好多飲食節目、旅遊節目畀我拍，當時比較少拍劇，對於嗰個年紀嘅我易handle啲，因為演技需要時間、需要人生嘅一啲經歷先會易上手啲，玩、食對一個廿零歲出頭嘅女仔嚟講會easy啲，所以當時都好enjoy，做做下就做咗咁多年嘞。
會唔會成日諗番如果十年前選美嗰陣，邊個環節表現唔同，賽果都會唔同？
我參選嘅時候其實壓力好大，因為有好多負面嘅新聞，但當時因為細個、唔識得去處理呢方面嘅情緒，就會覺得點解全世界都唔鍾意我呢？所以喺選嘅過程中，我係曾經患過抑鬱症，我試過突然間肥咗好多，每日不停食嘢，困自己喺屋企喊，仲要唔想畀爹哋媽咪知，因為係媽咪叫我參選，佢見到我咁，都好唔開心，我喺沖涼嗰陣喊，因為肥咗好多，每日起身又要跑步，有好多情緒上嘅嘢，當時處理得好差，淨係想快啲選完，覺得係一個解脫，我的確冇選中，選完我見到好多姊妹喺後台度喊，但係當時我冇喊，當時嘅反應就係：「終於都完咗嘞！」覺得我終於都完成咗呢件事，所以你問我覺得賽果點，或者當時希唔希望自己有好好嘅表現，我覺得全部都係整定，我唔會諗番話如果攞到冠軍就好嘞，反而我係由低做起，一步、一步，成長到依家，每一步經歷嘅嘢，都係有得著嘅。
全副身家得六百蚊
有無捱過麵包同經歷低潮？
梗係有捱過麵包啦，話你聽一個秘密，諗番都對徐淑敏唔係咁好意思，當時(09年)佢結婚，我啱啱選完港姐，我戶口真係得番六百蚊，佢請我去飲，我都知道人情其實大概要一千至千五蚊，但我真係得六百蚊，我將我成副身家畀晒佢做人情，當然佢唔會話我畀得少，但我心入面知道係好少，我都有試過捱，因為啱啱選完港姐，收入係好低、好低，都係靠爹哋媽咪幫補吓，但我都唔想靠佢哋咁多，因為佢哋都壓力大，我仲有兩個細佬，我爹哋媽咪又要供樓，佢哋喺女人街做嘢都辛苦，所以嗰時問我夠唔夠使，我都話我OK呀，都盡量慳，嗰時搭地鐵，盡量將使費減到最低。
外界覺得我無經歷過低潮，其實我覺得我好彩嘅，我入咗行之後，因為去咗《美女廚房》個trip，開始好多客戶搵我做嘢，贏得知名度同好多工作嘅機會，但都有好多係我失去咗嘅嘢，例如我需要用更加多嘅努力先可以證明畀大家睇我有嘅唔止係身材，呢樣係我到依家都仲喺度fight緊嘅，個角色有少少性感，我所有嘅努力就冇晒㗎嘞，大家淨係會睇到我泳池嗰場戲係點，其他無論點努力去演繹喊戲、傷心各樣嘢，冇人會睇到㗎！呢個就係有得必有失。
愛情重要過錢
成功買樓「上車」，負擔重唔重？
好重呀，壓力會大㗎，買樓呢樣嘢係我阿媽由細到大灌輸我嘅一個思想，因為我唔識投資，買磚頭好似係最穩陣，我媽咪爹哋後生好辛苦咁捱，都捱到兩層樓，所以當我有錢，我就儲首期買樓，開頭好想買大屋，大家一齊住，後尾發覺「上車」愈嚟愈難，惟有買間細先，好彩我做咗呢個決定，依家樓價又升咗嘞！想快啲供完，或者儲筆錢再買多間，要有動力嘛！
有傳你受殼王陳國強、王晶得寵後失寵嘅傳聞，你用咩心態面對？
除咗呢啲新聞之外，有時啲連個人物都冇，得個剪影，就話我畀富商A搞掂咗，我心諗你都畀啲誠意吖，得個黑影都可以作篇新聞，開頭我好介意，因為我好清楚我係幾咁腳踏實地嘅人，我亦都唔係貪錢嘅人，到話晶哥好錫我，晶哥係有畀好多機會我，我會唔會因為呢啲新聞而唔要呢啲演出機會？我唔會，因為我拍劇嘅機會唔多，所以每個角色我都做好佢，至於同公司老闆嗰啲傳聞，其實由頭到尾冇人影到張相，我同佢嘅接觸，都係每年台慶，佢喺台上，我喺台下，連打招呼嘅機會都冇。
被指同音樂人鄧智偉秘戀3年，係咪認定咗大家？
我可以講我依家嘅生活係開心嘅，因為多咗人support，心態唔同咗，我廿九歲嗰年突然間覺得，點解我好似未真正生活過，因為我身邊嘅朋友開始結婚、生仔，我開始檢討自己，我廿一歲入行，我入行後嗰八年，完全係工作，未試過好好enjoy拍拖係咩一回事，我好想做一個真真正正嘅人。
我信緣份嘅，我亦都係信感覺嘅一個人，我好渴望嗰種觸電嘅感覺、愛情嘅感覺，有句說話「你鍾意喺寶馬入面喊定踩住單車笑」我會揀坐喺單車後面笑，你畀好多錢我，但未必會喺身邊陪伴我，我係唔得嘅，我好需要溝通、陪伴，好enjoy做小女人，我爹哋媽咪到依家都好sweet，拖住手食飯，呢樣嘢好影響我，所以我憧憬好美好嘅婚姻生活，感覺、愛情對我嚟講係緊要過任何嘢，如果佢好愛我，我又好愛佢，我係唔介意一齊去捱。由細到大，我都鍾意好成熟嘅男仔，爹哋媽咪保護得我好好，變相唔係好識點去處理人際關係，我希望我另一半可以教識我好多嘢，我會好崇拜、好倚賴呢個人，畀我感覺無論遇到咩事佢都可以幫我孭上身、幫我解決。
你有冇結婚生仔嘅時間表？
細個覺得22歲結婚，25歲生BB，我好鍾意小朋友嘅，依家就覺得我一定會結婚嘅，我係結婚之後重心會擺喺屋企嗰啲女仔，一定會生BB，會畀心機照顧我嘅丈夫同小朋友，但幾時就順其自然，發生嘅時候我會同大家講。
你咁享受拍拖，點解唔公開？
我覺得拍拖係兩個人嘅事，或者係兩個家庭嘅事，但當我哋係公眾人物，好多嘢都要喺鎂光燈下面，我唔希望有其他任何嘅壓力去影響，呢個係兩個人嘅共識，到係時候、有好消息，我會接受大家嘅祝福。
延伸閱讀：
【潤肺止咳】沙參玉竹淮山海底椰瘦肉湯
