台北之旅 #10 回程/旅程後記(Raymond)

14/11/18 晴

台北之旅 2018 Sue & Raymond 16 - 21 October 2018
#thesweetestcoupleintaipei

#10 回程/旅程後記(Raymond)

Day6 - 21 Oct (Sun)

雖然今日我地係坐2:55pm班機返香港,但其實朝早都無咩可以做到,因為晏起身,預埋手信show hand同執行李既時間,都幾趕下.
於是都係自己走落街買早餐返Airbnb食,爭取時間.Sue想食程味珍滷味意麵的滷肉飯,我就想試埋另一間mark左既楊記排骨酥麵,當然唔少得永和豆漿的熱豆漿.
楊記排骨酥麵,排骨係用汁炆既,唔係炸,麵就普通油麵,整體一般,無乜特別,可能堂食會有風味啲.

終於要check out走了,拖住重重的行李,去捷運到台北車站,再跟指示沿地下通道行一大段路到機場捷運站.
我地坐既係12:45pm的紫色直達車,前往桃園機場第二航廈.
機場捷運車站及車廂都好靚好新既,但所謂的直達車其實行駛速度唔快,車速同香港的東鐵差唔多,純粹只係skip左一堆車站咁解.所以如果你追唔上直達車,其實轉搭普通車,時間都差唔多.

去到人山人海的桃園機場,呢度真係好繁忙,勁多旅客又多旅行團.我地趕去香港航空櫃檯辦理登機手續後,就入閘離境.
同到埗果陣一樣,禁區又係充斥勁多人,排隊過安檢條龍水蛇春咁長,之後過關同樣,淨係等都等左勁耐,十分懷疑如果起飛前40分鐘先到機場櫃檯,邊趕得切上機.
慶幸我地匆匆趕趕奔去登機閘口之時都有閒情去買盒太陽餅,haha.不過就無時間參觀機場各個富有特色的候機廳了.
今次呢班機好似新啲,起碼電視熒幕都係輕觸式,同埋好似多啲飲品serve,算係咁啦.

有啲唔捨得呢個旅程,不過同時又覺得今次玩得都七七八八,差唔多了.
唔捨得個位在於,台北真係一個吃喝玩樂的好地方,或者起碼係吃喝的天堂.太多選擇,而且樣樣都平,唔覺唔覺會食好多.
台北可能差緊啲主題樂園之類既野,但都有唔少地方有風景睇.啲人推介去開台北可以順便去埋宜蘭,將來都可以試下.
不過一般人去台北都係玩四日,我地第一次去玩成五日幾,基本上去勻晒要去的地方,每日chur左唔少行程,行左唔少路,人大了都感到疲倦,haha.
當然仲有少少地方都想去既,例如平溪,貓空等等,睇下將來有無機會再去.
不過我同Sue都好肯定,台北係一個幾正,可以再黎玩既地方,亦會想快啲再黎.
今次旅行難忘個位在於,我地出發前兩日臨時再調行程,本身應該玩得順啲,但慶幸調日子後turn out都頂得順,亦攝到時間去埋想去既地方.
同埋好好彩,九份十分大部分時間都唔算大雨,未至於要著住雨衣玩,同埋都享受到有陽光的台北市,以台灣呢個多雨水又多災多難既國家黎講,算係賺左了.
最後,亦好高興可以透過呢個旅程,改善Sue對台北的負面印象,我地響台北度過了一個開心的星期,每一個片段都值得回味!
(註: 如須索取我地台北之旅詳細行程作參考,歡迎留言告知,謝謝!)