《 軋鬧猛 》

------沈一珠

人間多有鬧猛，

勿軋勿爽；

排隊勿嫌伊長，

勿慌勿忙。

上海人歡喜軋鬧猛。月餅、青團，現在又新行出來喜茶、喪茶、紐約來的蛋糕……只要有鬧猛好軋，排一、二個鐘頭心甘情願。

舉個例子。桂花飄香的日腳，阿五搭仔小妹，兩個從小一道白相到大的小姐妹，搿天約好一道去南京路白相。兩家頭一出南京東路地鐵站，就看到前頭一家商店門口排仔長隊，阿五跟小妹講，儂先勒後頭排勒海，讓我到前頭去看看，勒賣啥好物事。

一歇歇工夫，阿五回來了，拉仔小妹就走。原來，人家勒買新上市的IPHONE ，阿五小妹勿會感興趣，就現在伊拉勒用呃手機，儕是兒子女兒淘汰下來的好伐。

兩家頭盪仔一歇，又看到前頭一隻老老長的隊伍，聞聞味道，嗯，應該是鮮肉月餅。看看也就十來個人，勿算多，就排勒後頭，想一人買一隻塞塞饞癆蟲。結果，排仔一大歇也勿看見隊伍朝前走。阿五到前頭一問：哦喲，每人頂多可以買60隻。格記僵脫了，人人儕排仔半半六十日，少買好像對勿起自家，結果幾乎人人儕買五六十隻。一鑊子烘出來差勿多立即脫銷，後頭人要，再要等一鑊子……

搿天阿五跟小妹兩家頭，回到屋裡辰光，天已經墨墨黑了，一人還拎勒五十隻鮮肉月餅。當然咯，反正就是白相，只要開心就好。

【滬語解釋】

搭仔：和。

一大歇：好一會兒。

僵脫：陷入窘境。

塞塞饞癆蟲：解解饞。

半半六十日:很長時間的意思。

點開能聽老師原聲滬語朗讀喲~