父子齊操！張繼聰谷子入港足

幸福人爸張繼聰，除咗有個天后老婆謝安琪照顧周到，一對寶貝仔女更為他增添唔少歡樂，女兒張靖未夠兩歲已經好有音樂感，能歌善舞表演慾強， 11歲寶貝仔張瞻，更遺傳咗爸爸超強運動基因，自小愛踢足球，4歲已在車路士足球學校學波，更決心要踢贏父親。為谷仔入香港足球隊，張繼聰同老婆謝安琪輪住陪仔上堂練波，前年更出動埋爺爺陪孫仔去上海特訓，又到西班牙作技術交流，日前，練得一身肌肉的張繼聰，帶同兒子去做Gym狂操，實行瞓身力谷愛兒變小球王！

撰文：東方新地圖片：新傳媒圖片、Instagram

張繼聰囝囝陪睇波變足球迷

眨吓眼，謝安琪張繼聰的寶貝仔張瞻今年已經11歲，夫婦教仔理念一致，不會狂谷仔女讀書、上補習班，自小就安排兒子升讀國際學校減輕功課壓力，讓他有更多空間發展個人興趣，受爸爸張繼聰影響，張瞻更是足球迷，4歲開始在車路士足球學校練波。據知情者透露：「阿Kay同阿聰教仔好開通，唔想個仔有太大功課壓力，小學開始就安排James(張瞻)讀國際學校，唔會迫個仔死讀書，兩公婆反而好鼓勵James發展個人興趣，因為細細個就陪住爸爸睇波， James自細已經好鍾意踢波，阿Kay都好支持個仔做自己鍾意嘅嘢！」

全家撐

張瞻受父親影響愛上踢足球，除咗有阿爸張繼聰落場教路，阿媽謝安琪亦經常會陪同兒子返足球學校上堂，自從女兒出世後，阿 Kay 更會抱埋囡囡全家出動撐兒子練波，趁機家庭樂。

4歲開始在車路士足球學校學波的張瞻，是校內精英隊負責踢前鋒及側翼進攻位置，球技有板有眼！

張瞻接受訪問時，坦承有信心將來球技可超越爸爸。

張瞻立志入港隊

小小年紀張瞻已經志氣宏大，公開受訪時自信表示，有信心將來球技能超越爸爸，更想加入港足。「爸爸差啲入港隊，不過中途去咗打籃球，我再踢落去就會贏到佢！」張繼聰亦全力支持兒子實現夢想。據知情者透露：「James知道爸爸曾經係足球青年軍，一路都好羨慕爸爸，仲以爸爸做目標，好細個已經話想將來入到港隊，阿聰自己都咁鍾意踢波，當然好鼓勵個仔做自己鍾意嘅嘢，知道個仔迷車路士，喺阿仔4歲嘅時候，已經安排佢入車路士足球學校，畀佢接受專業訓練，James本身都好有天份，踢咗幾年，依家技術已經超晒班，喺球隊負責踢前鋒及側翼進攻位置，係校內精英隊。」

父子拖住行

即將到貴州開工的張繼聰，近日爭取時間湊仔，日前父子出動去做gym，張繼聰在旺角朗豪坊停車場泊低車後，全程拖實兒子行，確實係緊張好爸。

兩父子穿過商場行去健身中心。

陪仔上堂

兒子踢波潛質優厚，即使唔係球迷，謝安琪再忙都會抽時間陪兒子練波，張瞻10歲時更由爺爺陪同到上海參加訓練營，上年又去西班牙作技術交流，有過唔少實戰經驗。知情者謂：「阿Kay本身就係個貼地媽媽，佢幾忙都一定會爭取時間自己湊仔，James讀幼稚園同上小學，佢都會揸車接送個仔返學放學， James每星期要返足球學校練波兩日，佢得閒會抽時間陪個仔上堂練波，話要用行動支持個仔，阿聰就更加唔使講啦，佢會陪埋個仔落場踢㖭！又會教個仔好多踢波嘅技巧，本來佢都鼓勵兒子打籃球，不過James完全冇興趣，佢哋好民主，不過亦有提醒個仔，如果想要做到成績，就一定要堅持到底！千祈唔好遇到困難就放棄！」

谷fit個仔

11 歲張瞻開始長高，但身形仍然偏瘦，睇嚟阿聰真係好想操 fit 個仔，張瞻對健身亦大有興趣，不時捉住爸爸教路，然後兩父子分開練習。

keep住操

拍《誇世代》教埋陳豪keepfit的張繼聰，至今仍每星期 keep住做gym狂操，一身肌肉絕對得來不易。

張繼聰有健身教練Brenda教路多年，健身成績顯著，近日就帶埋阿仔一齊操 fit ！

俗語有話虎父無犬子，張瞻就似足童星出身的張繼聰多才多藝，除咗踢波叻，亦表演慾強，去年更開咗個YouTube Channel，拍片做埋YouTuber ，又在IG開埋Account，不時拍片直播和大家互動，父母亦有follow𥄫實。

近年積極健身的張繼聰，練得一身肌肉，不時公開晒料，兒子張瞻亦視爸爸為偶像，跟住爆肌有樣學樣！

補充體力

做Gym做足兩個鐘，父子行去攞車前先去超市買飲品補充體力。

一齊健身

本來拍完無綫劇《老表》系列及《誇世代》形象入晒屋，張繼聰大有機會在TVB大展拳腳，偏偏因為經理人蕭定一拖欠無綫片酬，連累他被封殺，近一年轉攻電影，有失亦有得，工作量不多反而令他多了時間湊仔，近期他就不停放相上IG放閃，幸福湊仔公對住一對仔女就眉開眼笑，不過今個月底將到貴州拍新片三個月，阿聰坦言怕到時會掛住個女而匿埋喊。

張瞻性格內斂，全程攞住本圖書睇，同爸爸感情更非常好，父子在超市揀嘢亦全程黐到實傾偈，唔會各有各睇！

趁未開工亦爭取時間陪仔女玩，日前他孖住11歲寶貝仔張瞻一齊去做健身。當日下午一時許，張繼聰駕車載著兒子由大埔比華利山寓所出發，去旺角做Gym，在朗豪坊停車場泊低車後，拖住兒子一齊穿過商場行去健身中心，近年跟教練狂操日子有功，阿聰身形健碩手瓜相當大隻，去到Gym 房，他亦唔偷懶不停舉重及拉肌，張瞻亦不時捉住爸爸教路，雖然只係初哥，張瞻亦非常勤力練習，父子操足兩個鐘先離開，睇嚟想做足球小將的張瞻，真係好努力操fit要追貼爸爸！

買糖氹女

揀完嘢飲畀個仔，張繼聰亦有買糖相信是用嚟氹家中寶貝女，之後先去排隊畀錢。

愛妻號好爸

39歲的張繼聰，絕對是愛妻號兼廿四孝好爸，一家四口在他的個人社交網出鏡率極高，幸福人夫人爸最愛放閃光彈！

家庭裝賀年

大年初一，全家著上Polo家庭裝賀年。

結婚12周年

不經不覺，同老婆謝安琪結婚 12 年，雖然曾經有過長時間的女尊男卑，不過夫妻同心捱過風雨，感情一直堅固。

活力十足

去年工作量減少的張繼聰，亦以湊仔女為樂，老婆謝安琪開工，他一個人帶著一對仔女去睇騷，張瞻更同妹妹隨著音樂跳舞，動感十足！

鍾意唱歌

女兒亦遺傳了父母的優良基因，歲幾人仔，已經充滿音樂感。

幸福湊仔公

望住一對寶貝仔女，張繼聰已經甜到入心。

謝安琪視覺下的老公張繼聰：我好似個阿叔！

用老公視覺影自己女神老婆就緊係以最靚角度，相中嘅謝安琪自然而唔造作嘅pose就獲得唔少網民讚賞！不過，張繼聰就留言一段兩公婆嘅對話：「我：『依個位靚呀，企埋去幫你影張相吖』 ..兩秒影完，張相水準的確好高吓，佢：『真係ok喎☺️咁你埋去，我幫你影吖』..影完……我攞番手機一睇….佢：『點呀？ok嗎？』我：『好好呀 ! 我好似一個阿叔第一次去旅行咁….』 …之後去其他景點，我冇再影相…..」，淨睇段對話都認真笑爆嘴！

View this post on Instagram
我：「依個位靚呀，企埋去幫你影張相吖」 . . 兩秒影完，張相水準的確好高吓🍃 . 佢：「真係ok喎☺️咁你埋去，我幫你影吖」 . . . .影完……我攞番手機一睇…. . 佢：「點呀？ok嗎？」 . 我：「好好呀 ! 我好似一個阿叔第一次去旅行咁….」 . . . 之後去其他景點，我冇再影相…..
A post shared by 張繼聰 Louis (@louischeung2013) on Mar 14, 2019 at 8:42am PDT

老婆視覺下的老公

相信大家都好想睇下究竟喺老婆視覺下嘅張繼聰有幾大叔，有相為證，張繼聰亦上載自己老婆為佢影嘅作品，睇到張繼聰好生硬咁企定定，但成塊面就暗晒，成張相嘅感覺同謝安琪嘅獨照差好遠，唔怪得網民都不斷留言笑指：「係人問題，造型同pose既關係」、「唔係呀！你嗰張影得幾靚呀！影後邊座山」、「我笑咗出嚟」、「完全明白你心情」等等。

即時回顧：

張繼聰街頭唱情歌冧謝安琪

張繼聰在Instagram上寫道：「老婆話唔要啲物質禮物，但係要難忘嘅冧豬嘅幾十年後都記得嘅，於是我帶佢去海旁，問班年輕人借咗啲架生……」原來佢問喺海旁嘅年輕人借咗支結他，即興自彈自唱張學友首《每天愛你多一些》冧老婆，片中所見現場有近百人圍觀，見證呢個浪漫時刻！

當鏡頭影到Kay時，佢笑得好燦爛好冧成副冧樣出晒嚟，相信呢份禮物最永恒，也令呢位幸福人妻一世難忘！

張繼聰仲話要多謝班借樂器畀佢嘅年輕人，更向Kay表白話要「每天愛你多一些」，兩公婆恩愛到暈。

原來獻唱前仲有段小插曲，張繼聰話喺海旁遇上周國賢夫婦，而周國賢除咗幫張繼聰拍片，都有份拎起結他獻唱佢首《目黑》！

張繼聰冧完今世情人，再發咗張同前世情人嘅相，佢上載咗張咀嘴囡囡溫馨照祝大家情人節快樂，仲搞笑話張相係「激嬲老婆系列」！

大家一齊睇片，感受吓當時場面有幾冧！

View this post on Instagram
《做d顛嘢系列》 . . 老婆話唔要d物質禮物，但係要難忘嘅冧豬嘅幾十年後都記得嘅🍃 於是我帶佢去海旁，問班年輕人借咗d架生…… . . 講都無人信，仲要撞到Endy同阿嫂 😂 氹老婆嘅嘢，梗係搵啲志同道合嘅人一齊啦（主要係互相拍片😂）P.S.十分感謝借樂器比我地嘅年輕人s😘🙏🏻打攪晒😅🙏🏻 . . #唱得唔好都冇得介意🤣 #好耐冇試過 #邊唱邊淆 #誠意搭夠 #退咗役係咁上下😝 #Endy真係好正😍 最後最後 , @kaytse #每天愛你多一些❤️ #happyvalentinesday @endychowjaugwokyin
A post shared by 張繼聰 Louis (@louischeung2013) on Feb 14, 2019 at 8:19am PST

結婚12周年！張繼聰送浪漫金句冧謝安琪

早前係張繼聰同謝安琪結婚12周年，二人選擇食餐飯，簡簡單單地慶祝。張繼聰上載一張由美國作家及新聞工作者Mignon McLaughlin 寫嘅金句「A successful marriage requires falling in love many times ,always with the same person.（一段成功嘅婚姻要不斷與同一個人墮入愛河」送俾老婆，真係超級浪漫！

View this post on Instagram
「A successful marriage requires falling in love many times ,always with the same person.」 By Mignon McLaughlin . . 12週年快樂❤️
A post shared by 張繼聰 Louis (@louischeung2013) on Jan 20, 2019 at 9:04am PST