90后一定有共鸣！许留山由一杯芒椰奶西见证时代

约边？许留山见啦～

香港人食完饭去食返碗糖水或者甜品，呢个习惯都可以算系香港独有嘅文化之一，所以糖水舖开到周街都系，台式饮品、甜品呢几年特别受大家欢迎，不过讲到香港人嘅糖水舖，许留山都算得上系大家其中一个集体回忆。放学去，放假又去，当时唔兴去cafe扮文青，唔少学生就系去许留山叫个甜品，坐喺𠮶到吹水hea时间。如果𠮶时无食过许留山，真系好out㗎！当然，时移势易，依家后生仔一早就唔再流行去许留山啦。

今日DailyView用《KEYPO大数据关键引擎》分析咗网民讨论许留山嘅网路大数据，许留山上年喺Facebook搞嘅抽奖活动掀起一波讨论热度，吸引咗好多人留言热烈参与，而另一个最高峰就系近日传出面临结业嘅消息。因为被清盘而令许留山即将成为一代香港人嘅回忆，其实今年一月开始许留山已经陆续有十几间舖执咗，今日走到呢一步，早就有迹可寻呀。

「拍拖」必食嘅甜蜜之选

拍拖活动离唔开行街、睇戏、食饭，糖水直落，两个人一齐食返碗甜蜜蜜糖水，为拍拖日画上一个完美嘅句号。唔少人拍拖都去过许留山食嘢，如果段感情有好结果，每次旧地重游，都会谂返起过去甜蜜嘅回忆，但如果系一个遗憾收场，今日见到许留山成为历史，会唔会令你谂返起当年同你一齐食一碗甜品嘅𠮶个人呢？

image source:Facebook/ 许留山

「可惜」天下无不散之筵席

许留山以前被称为喺香港必食嘅芒果甜品店，唔少商品带起热潮，成为港式甜品店嘅代表之一，好受游客欢迎，仲曾经两度喺台湾开设分店。一代经典甜品店今日要清盘都几可惜，由专为香港人打造嘅甜品店，后尾慢慢演变成专做游客生意咁滞嘅舖头，喺时代嘅巨轮之下，同大家讲byebye，呢个都系无可避免嘅结果。

image source:Facebook / 陈艾熙 Amber Chen

90后「回忆」中嘅味道

属于咁多香港人嘅集体回忆，今日即将面临结业，可能唔少人都觉得好唔舍得。之不过俗语有云：「天下无不散之筵席」，每一个时代都有属于𠮶个时代嘅人事物，所谓「旧嘅唔去新嘅又点来呢」，而家最受欢迎嘅糖水舖，可能过多10年亦都会被淘汰，记住过去嘅美好之余，都要继续向前看，努力面对未知嘅将来～

image source:Facebook/Cookie Run 跑跑姜饼人香港站许留山——芒果界嘅代言人

提起咏春你会谂起叶问，讲到芒果？就一定谂起许留山！讲起许留山，一系列用芒果做招牌嘅甜品就即刻喺脑海浮出，当年推出芒果西米捞之后大受欢迎，多芒小丸子、芒之恋、多芒西米露，多芒捞河等等。啖啖芒果加上许留山自家制小丸子同埋椰汁河粉等嘅配料成功打造出多种王牌甜品，甚至可以话系谂起芒果就会谂起许留山。咁多种产品入面，唔知边一款系你心目中最经典嘅甜品呢？我哋仲帮大家用咗网路大数据调查咗许留山以下两种网路热度最高嘅产品，你又有冇食过呢？

image source：FB / 许留山

芒椰奶西（网路热度：493笔）

许留山经典饮品「芒椰奶西」，入面有椰汁、芒果汁、芒果粒同埋西米，做成杯装令大家随时随地都可以饮得到，唔需要坐低都可以叹西米露，够晒方便。虽然一般定价都唔算平，不过有时会员限定优惠价10几蚊就饮得到。呢款简单又稳阵嘅甜品，相信可以满足到绝大部份人嘅口味。

image source:Facebook/ 许留山

芒椰芦荟爽（网路热度：220笔）

「芒椰芦荟爽」一听就知道，饮品嘅基底仍然系招牌芒果果肉同芒果汁加椰汁，另外加入咗女士好钟意嘅芦荟，热量低又健康之余，口感上亦都更加丰富，所以一直都系手调饮品入面嘅王牌产品。冰冻嘅芒果加上椰汁，配上粒粒芦荟，喺夏天饮特别消暑解渴，好受大家欢迎。

image source:Facebook/ 许留山

许留山陪伴我们成长

Twins—友谊第一

「让我们结伴探访许留山～感情不必分你高班我低班～」唔知大家对呢句歌词有冇印象呢？Twins呢个组合都系好多香港人嘅童年回忆，小编细个𠮶时几乎全部同学偶像都系Twins。佢哋同许留山就好似系𠮶个年代入面长大嘅人拥有嘅共同回忆，今日许留山要结业，而香港乐坛都早就换咗几批嘅人。呢首歌眨吓眼已经系十几年前嘅歌，相信经历过𠮶个年代嘅人对于许留山结业，都会对于呢种「改朝换代」特别有感触。

他约我去许留山

当年一首《他约我去迪士尼》红遍香港嘅网络原创曲唱到街知巷闻，创作者Kellyjackie就系特别为当时即将开幕嘅迪士尼写咗个首歌。而2011年有网民为咗表达对许留山嘅「爱意」，特别改编咗呢首歌，由去迪士尼改为去许留山。改编版入面提及多种许留山嘅甜品，歌词搞鬼之余亦都非常贴地，够晒香港本土味，相信香港人听到都会会心微笑。唔知呢首会唔会系第一首因为糖水舖而写嘅歌呢？